رأيى عن أحداث السفارة الإسرائيلية

بالراحة … وبالعقل
إيه اللى كان المفروض يحصل ؟
اللى كان المفروض يحصل بناء على الدعوات اللى تم تبدالها على النت .. الفيس بوك .. تويتر . هو التظاهر السلمى والمطالبة بطلبات محددة .
إيه كانت الطلبات دى ؟
1- تحديد جدول زمنى لإنتقال السلطة من المجلس العسكرى لسلطة مدنية .
2- رفض محاكمة المدنيين أمام المحاكم العسكرية .
3- التأكيد على إستقلال القضاء
4- سرعة تطهير الداخلية ومحاكمة كوادرها وظبط عملها
إيه رأيك – محمد حمدى- فى الطلبات دى
رأيى إنها مطالبات رائعة وعادلة وتستحق التظاهر السلمى وأنها من أساسات حقوق المواطن المصرى الشريف 
هل تم تنفيذ المطالب دى ؟
لاء
ايه اللى اتنفذ منها؟
لاشىء .. زيرو ..
أمال إيه اللى حصل ؟
 اللى حصل الصبح كان مختلف عن اللى حصل بالليل . تقريبا الساعة 11.30 او 12.00 مساء كانت الساعة الفاصلة فى كل الأحداث دى . البداية كانت الصبح .. جميلة ومشرفه وسلمية . وبما انى مسئول عن تغطية الأحداث لحظة بلحظة على موقع جيلنا فا أنا لاحظت إن معظم المشاركين أجمعوا إن 9 سبتمبر كان من أحسن أيامهم وإنه فكرهم بأيام 25يناير المجيدة .
ثم فى فى فترة العصر بدأ التجمهر قدام السفارة .. الأمن سكت .. بدأ التجمهر يزيد .. الأمن سكت .. بدأ الناس يخبطوا فى الجدار العازل .. الأمن سكت .. الناس بتكسر الجدار العازل .. الأمن سكت .. الناس هدت الجدار العازل .. الأمن سكت .. بعض الناس تسلقوا العمارة .. الأمن سكت .. الناس رمت علم اسرائيل .. الأمن سكت .. الناس علقت علم مصر وفلسطين .. الأمن سكت .. الناس اقتحمت السفاره ورمت الأوراق من فوق .. الأمن ضرب قنابل مسيلة للدموع .. لحد دلوقتى اكتر من 200 مصاب وقتيل واحد على الاقل و4 جرحى فى حاله خطيرة . 
هل ده صح؟ هل ده كويس؟
الإجابه على الجزئية دى ليها شقين .. شق  إيجابيات اللى حصل وشق سلبيات اللى حصل
فى رايى إن الإيجابيات هى : 
1- الرساله وصلت لكل من يهمة الأمر : مينفعش تتجاهل رغبات الشعب المصرى . لانه بينفذها بنفسه لما تضيق بيه الأحوال
2- الشعب المصرى معندوش غير كرامته . لو جيت ناحيتها هيفرمك
3- الشعب المصرى هو صاحب السلطة الأساسية والرئيسية فى البلاد . والسلطات الداخلية قبل الخارجية لازم تعرف ده كويس
4- اسرائيل دولة محتله متفهمش غير لغة القوة .. اللى حصل ده هيوصل لها رسايل كتير اوى كانت محتاجة توصل وبالإسلوب ده
5- لو حد جه فى باله ان محاكمة مبارك هتعدى بالكوسه والتزوير ينسى ده لان الشعب مش هيسكت
أما عن السلبيات هى من وجهة  نظرى :
1- الذعر والرعب للمصريين سكان المنطقة اللى فيها السفارة . جربت تقوم مفزوع من نومك على صوت انفجار اطار عربية؟ فما بالك بكل اللى بيحصل هناك ؟ ناهيك عن القلق المصحوب بعدم معرفة الخطوة القادمه للتصعيد . وحاجه مش كويسه انك تبقى قاعد تلاقى اللى بيخبط على شباك بلكونتك بيقولك دخلنى عندك انا كنت طالع اجيب العلم الاسرائيلى ونازل
2- حالة الطوارىء واستدعاء كل الاجازات من الداخلية ممكن تخلق حالة فوضى وانتشار بلطجية اشبه باللى حصل ايام يناير
3- الطلبات اللى تم الاتفاق عليها فى البدايه لم يتم تنفيذ اى حاجه منها رغم ان اى بند منها لو كان اتطبق كان هيغنينا عن كل أحداث السفاره الإسرائيلية

4-  الوضع السىء لمصر قدام العالم وظهورها كدولة مش قادرة تحمى السفارات الموجوده فى ارضها ، ناهيك عن احتمال تعرضنا لعقوبات دولية أو إننا ننجر فى مواجهه مسلحة او شبه مواجهه مش مستعدين لها حاليا ، وان كنت استبعد اى مواجهه مسلحة لان اسرائيل جبانه ومتجيش غير بضرب الجزمه . وراجع النقطه 4 فى الايجابيات .

5- مش حاجه كويسه اننا ندعو لحاجه وننزل ارض الواقع ننفذ حاجه تانيه خالص . سواء اللى حصل احسن او اوحش من اللى كان المفروض يحصل لكن المفروض تكون الفكرة الراسخة هى اننا ننفذ اللى اتفقنا عليه
6- لو متضايق من معاهده كامب ديفيد او عدم طرد السفير او قتل العساكرعلى الحدود . اضغط على حكومتك ومجلسك العسكرى عشان يغيروا ده . او تغيرهم انت من خلال ضغطك وتجيب اللى ينفذ اللى انت عاوزه . لكن انك تغير ده بايدك بيصغرك كدوله قدام العالم . ومش حاجه حلوه ان مصر تبقى صغيره ومش عارفه تحمى السفارات اللى فيها
7- مصر (التراب والنيل والاهرام ..الخ) حاجه .. والمجلس العسكرى او رئيس مصر القادم او الحومه شىء   تانى خالص ، وفى رايى ان اللى بيحصل ده هو خلط بين المفهومين دول . فى ناس بتإذى مصر ومتخيله انها بتإذى الحكومه أو المجلس أو أيا كان إسمه . وده مش صح
8- إسرائيل دولة صديقة بحكم معاهدات السلام والتجارة بين البلدين . لو مش عاجبك الحقيقة دى روح حاسب اللى سحب الشرعية الشعبية من تحت رجليك واتصرف بدون ما يرجع لك ويشوف إنت رأيك إيه كمواطن وصاحب دولة ، قبل ما تحاسب إسرائيل ككيان إنتهز إنك كنت فى غيبوبه سياسيه طول عمرك تقريبا وعمل اتفاق مع اللى ضحك عليك ونيمك فى العسل
9- اسرائيل ممكن تعمل نفس التصرفات (شعبا او حكومه) مع سفارتنا فى مصر .. تفتكر دى حاجه كويسه؟
وليا كمان شوية ملاحظات :
– وانا بكتب الكلام ده فى اشتباكات بين المتظاهرين والأمن . ليه ؟ مش اقتحموا السفاره وهدوا الجدار ورموا المستندات ورموا العلم ؟ مطلوب ايه تانى ؟
-الكلام عن الايادى الخفية مقزز .. الكلام عن فلول النظام وانهم اللى دبروا ده . والكلام عن الاخوان والسلفيين ان هم اللى دبروا ده كل ده كلام ميخشش دماغى ببصلة . محدش كان نازل النهرده وعارف ان اى حاجه من دى هتحصل
-حالة التخوين المنتشرة على الانترنت سيئة جدا . لو انت مع اقتحام السفاره تبقى بلطجى غبى همجى . ولو ضدها تبقى فلول متواطىء صهيونى . 
– لو كنت متضايق من اسرائيل علشان موضوع القتلى المصريين على الحدود راجع النقطة 8 فى السلبيات ، وافتكر ان حماس قتلت لنا ناس على الحدود قبل كده ومحدش فتح بقه ساعتها
أما لو كنت متضايق من اسرائيل علشان القضية الفلسطينية ، أحب أقول لك اننا لازم نكون أقوياء ومستقرين داخليا قبل ما نواجه العدو الخارجى ، وانا كنت بشجع المطالب الداخليه ليوم 9/9 قبل ما يتحول لما تحول له فى نهاية اليوم
مساحة التعليقات مفتوحة لأى حد عنده رد على اى نقطه من دى او عاوز يضيف ايجابيات او سلبيات أو أى ملاحظات تانيه

محمد حمدى

7 Responses to “رأيى عن أحداث السفارة الإسرائيلية”

  1. haneen nidal Says:

    صباح الخير و ان شاء الله الخير قادم لمصر و ربنا حميها بخيرة اجناد الارض فياريت ما تقلقوش كتير على مصر لانها محمية من العظيم الجبار اقولك على حاجة كلامك دا اروع كلام و تحليل عن احداث يوم الجمعة الي عدت على الفيس او توتير او بلوجر لانك شعلت النور على صميم الاحداث بعيدا عن السلمية الي بتنبح فيها حناجر كثير و الي يغيض اكثر انو بتطلبها شخصيات مرموقة تصدمك و ترفع ضغطك !اقولك على حاجة تانية من قبل احداث يناير و قبل ما تشتعل الثورة بمصر انا تمنيتها لمصر و تمنين اكون مصرية او اكون في مصر عوزها و بسرعة كا ن كثير مش متوقعها ( مصر مستحيل ! ) بس انا عارفة انو الشعب دا شعب عظيم و مصر هي الدولة الوحيدة و خصوصا في دول الطوق ( مصر الاردن سوريا و لبنان ) الي رغم كامبديفد قادرة ترعب اسرائيل ميهمكومش الحصار ع غزة و موقف السلطة منه و اغلاق المعابر الشعب لا يساوي الحكومة !وحصلت الثورة صرت يوم اخشاها و يوم افرح لمسارها و افتخر و اقول لناس مش قلتلكم رغم اني اتشتمت في البداية ومن مصريين همه بمكانه اهلي و ربنا اعلم باسوء كلام قلت معلش بكرة يفهموااصلي انا عارف الشعب دا كويس هو الحلم الوحيد لنور اصلي عشت في الاردن و درست في سوريا و عارف البنان و شعبها رغم انها الشعب الوحيد الي لسا في الساعة شارع سلاحو بفضل حزب الله بوجه اسرائيل و مزاكرة التاريخ كويس لهيك اكيدة انو مصر طوق النجاة بدت الثورة سلمية و الحمد لله حققت كتير بس اي هية السلمية الي عوزينها تكمل فيها ؟ مش عارف همه سلمية او استسلام الي بدهم اياه وخصوصا مع اسرائيل هي اسرائيل تعرف غير الاستسلام ؟ يا جماعة خليها تخاف بلكي تختشي شوية و بعدين الثورة ثورة مينفعش تكون حساسة لازم تحسم الامور حتى مبارك مكانش المفروض تحاكموا و لا تحاكم حد اصلا لازم كانت المحكمة الميدان و شراعها واحد العقوبات رادعة القاتل يقتل و السارق تقطع ايدوا منشان غيروا يحرم و لا ايه ؟في ناس ما بتفهم غير بالعين الحمرة في الختام يارب ما كون عكيت و سامحني لو طولت عليك

  2. haneen nidal Says:

    نسيت اقلك على حاجة تاني . . . اي هي العقوبات الدولية الي خايفين منها ؟اي عقوبات دولية و انتم الي بصدروا الغاز لاسرائيل و اي عقوبات دولية و قناة السويس مصرية ؟امبارح عجبتني جملة لتميم البرغوثي ع اتويتر ( قد سبق أن اقتُحمت سفارات من قبل، لا يترتب على ذلك شيء كبير دولياً، سفارة الصين في بلغراد قُصفت قصفاً ولم يحدث شيء )

  3. ع.سالم Says:

    تحليل شديد الدقة .. يستحق الshare !شكرا..

  4. Anonymous Says:

    كلامك جميل اوى بس ليه دلوقتى الحكومة عملة اجتماع طارىء و اوباما مش مبطل كلام مع النتن او تصاريح بان مصر تأمن السفارة والكل بيقول ان مصر هتتعرض لعقوبات دولية وانها خالفت كل الالتزامات وان بينها وبين ولاد التيت معاهدة سلام وان شكلها بقى وحييييييييييش اوى امام العالم ووقت ما ولادنا ماتو على الحدود احنا اللى كنا خيفين من اننا ناخد اى قرار كل اللى عملناه اننا هاااااااااااانعمل تحقيق مشترك ان شااااااااااااء الله ملاحظة:انا مش مع اللى حصل بيننا و بين الامن المركزى و ما شاء الله عليك

  5. New Image Says:

    الحمد لله ان فيه اصلا مسار وان هناك من يريد ان يصححه ، والقارئ لكل ما حدث فى هذا اليوم ، يرى أن كل ما كان من شأنه البحث عن الاحتكاك مع الداخلية تحت أى مسمى – أمن مركزى -حراسة منشات-وزارة الداخلية نفسها ، اى حاجة تبع الداخلية ، البداية دار القضاء العالى بحثا عن الداخلية-السفارة الاسرائيلية بحثا عن الداخلية ولما كان هناك سور و حاجز جديد ، طيب وماله نكسره عندا فى المجلس العسكرى وممكن تطلع لنا الداخلية ، ولما خلص السور و انكسر ونزل العلم واتحرق وبرضه مفيش داخلية – نطلع السفارة وندخلها – طيب نطلع على وزارة الداخلية طيب نرمى طوب و حجارة -برضه مفيش فايدة ماردوش علينا – طب نولع لهم فيها – يوووه برضه مفيش – طب نرجع للسفارة طالما لقت استحسان عن باقى الشعب وبيشجعونا هناك – طب ما تيجوا نطلع على مديرية أمن الجيزة – أهى جنبنا مش بعيد – لاء تعالوا بسرعة الامن المركزى ظهر عند السفارة-طبعا لما بدأ السفير الاسرائليى فى الاستعداد للسفر وطلب الطائرة الخاصة والاخبار تناقلت على انه بيهرب بجلده وان الدنيا والعة فى ووزير الدفاع الاسرائيلى يتحرك دبلوماسيا مع امريكا – وتيجى الاوامر لسرعة ظهور الامن المصرى وانه بيحاول يرد على المتظاهرين وانه ماسك زمام الامور . يا ناس ، مين الغلطان فى حق هذا البلد – الداخلية اللى غصب عنها كان لازم تبعد عن الانظار فى هذا اليوم لانها مستهدفة من غضب الجماهير وطريفة تعاملها مع جمهور كرة فى مباراة ، ولا ادارة شئون البلد اللى خايفة تدير بحزم وتواجه لاحسن تزعل حد-سياسة المجلس العسكرى مثل حكومة شرف- نفس اللا روح – وكأن فهمهم لتسيير الاعمال يعنى – قضيها ، ودع الملك للمالك ، وخليها تسبح – لازم نواجه سلبياتنا – البلد مش تمشى زى زمان بجروحها و مشاكلها والا هنرجع تانى نقيضها وبس ومش هنتحرك من مكاننا من كتر مشاكلنا ، لن نبدع لن ننافس لن نتحرك للامام ، لابد من جراحة واستئصال كل ما ينغص حياتنا، سنتألم سننكوى – لكن سنشفى – ونعيش فى مرحلة النقاهة – وسنقوم أقوياء ، علينا ان نواجه – لا تترك القيادة والانتخابات هى التى تبدأ والا ستكون بمثابة زرع و صناعة زعيم ديكتاتورى جديد – هو بس اللى يقدر يدينا الامن والامان والهدوء والاستقرار فى العلاقات الخارجية على ايده – يااه ده احنا من غيره كنا مفيش – عايزينه معانا طول العمل .. كفاية بأه – هنعيده تانى

  6. Anonymous Says:

    كلامك جميل اوى بس ليه دلوقتى الحكومة عملة اجتماع طارىء و اوباما مش مبطل كلام مع النتن او تصاريح بان مصر تأمن السفارة والكل بيقول ان مصر هتتعرض لعقوبات دولية وانها خالفت كل الالتزامات وان بينها وبين ولاد التيت معاهدة سلام وان شكلها بقى وحييييييييييش اوى امام العالم ووقت ما ولادنا ماتو على الحدود احنا اللى كنا خيفين من اننا ناخد اى قرار كل اللى عملناه اننا هاااااااااااانعمل تحقيق مشترك ان شااااااااااااء الله ملاحظة:انا مش مع اللى حصل بيننا و بين الامن المركزى و ما شاء الله عليك

  7. sony2000 Says:

    بجد الموضوع عجبنيجداوبصراحه حطيتوا علي جروب المدونين علفيسممكن.؟

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: