دماغيات 1

مبحبش السرطان !
أنا مبحبش السرطان .. أو بمعنى أصح بخاف منه . ولو كان السرطان رجلا لكنت أجرتله بلطجى أو إتنين من بلطجية الكباريهات وخليتهم يقتلوه .. السرطان أخد منى خالى , وهو واحد من أعز وأقرب الناس فى حياتى الشخصية , كمان السرطان تهديد دائم لناس كتير أنا بحبهم , وكمان السرطان تهديد دائم ليا انا شخصيا … السرطان قنبلة لا نعلم متى ولا كيف ولا فى من ستنفجر …
أنا مبحبش السرطان .
* * *
مين اللى فهم الناس إن الإنسان الفقير اللى بيدوله فلوس من صدقتهم أو زكاتهم هو إنسان معدم هيروح يشترى رغيف عيش بايت ويقعد فى الشارع ياكله ؟! وكإنما الشحات ده منفسوش يشرب فيروز أناناس أو ياكل فى مطعم مشويات مثلا ! ليا صديقه كانت بتدى فلوس بانتظام لواحد زبال شغال فى شركة النضافة , وبعد فترة لقيتها بتشتكيلى إنها كانت ضحية نصب الراجل ده وتلاعبة بمشاعرها لانها اكتشفت انه بيدخن سجاير ومعنى كده انه مش محتاج الفلوس دى , وانها حرام تديله فلوس يروح يشرب بيها سجاير بينما ناس تانيه مش لاقيه تاكل ! 
من فترة كنت متعود أقعد فى كافتيريا معينة , وكان بييجى ولد صغير يبيع مناديل للناس , وحصلت شويه مواقف خلتنى أعرف الولد ده عن قرب وأعرف والدته , أتارى الولد ده بيصرف على عيله كامله من فلوس المناديل … بعد فتره مبقتش اكتفى انى اديله فلوس بس .. كمان خليته يقعد معايا مره يشرب حاجه ساقعه .. مش ديما الناس الفقيره محتاجه فلوس بقدر ماهى محتاجه تحس بحرية الإنفاق من الفلوس اللى الناس بتديهالها .. حتى لو فى سلع رفاهيه .
* * *
الفكرة العامة عند عوام المسلمين إن أى مسلم مهما أخطأ مش هيخش النار الا لمدة توازى ذنوبه بعد كده هيروح الجنة , على عكس أى شخص من أى ديانه تانيه ده اللى هيخلد فى جهنم ومش هيطلع منها . والمسيحية بتقول إن اللى يخش الجنة هو اللى قبل يسوع كمخلص , وإن أى شخص مش مؤمن بيسوع كمخلص مش هيخش الجنه حتى لو ساعد كل أهل الأرض .. ونفس الفكرة متكررة فى باقى الديانات السماوية وغير السماوية .. السؤال : هل فعلا معيار دخول الجنة هو الإيمان الشفهى برسول أو ديانه معينه ولا العامل الاهم هو أعمال الإنسان ومساعدته لإخواته فى الإنسانيه وعدم أذيتهم بغض النظر عن الديانه اللى الإنسان ده مؤمن بيها ؟
* * *
شيوخ التشدد الدينى الـ Default  بتاعهم هو التحريم عمال على بطال والتشديد والرفض والتعنت والتضييق على حياة الناس .. بحس الشيخ منهم إيده بترتعش قبل ميقول كلمه (حلال) أو (يجوز) أو (مباح) !
* * *
مفيش حد مشهور مات إلا وثارت حول موته الأقاويل .. عبد الناصر مختلفين مات مقتول بالسم ولا مات موته طبيعية .. السادات هل حصل تواطوء داخلى ضده ولا قتله الجماعات الاسلامية اللى هو قوى شوكتها .. عبد الحكيم عامر مات مقتول ولا منتحر؟ .. مارلين مونرو ماتت منتحرة ولا مقتوله بسبب علاقتها بالرئيس الأمريكى .. هل أعدم صدام فعلا ولا ده كان واحد شبيهة ؟ حتى مايكل جاكسون ظهرت اشاعات تقول ان خبر موته مجرد دعايه لالبومه القادم , وهل مات مسموم ولا منتحر ولا مقتول … باختصار : الناس مش بتصدق إن شخص مشهور شهرة كبيره يموت بشكل طبيعى .. علشان كده الكل بينسج قصص وهميه عن اساليب واسباب غريبه لموت الناس دى .
* * *
الاسكندريه مدينة الرب وفيروز صوت الرب .. لذلك الاستماع لفيروز اثناء التمشية على الكورنيش هى عمل دينى بحت !
***
الأغانى مخازن للذكريات والمشاعر الجميلة والوحشة .. والمزيكا هى الحاجة الوحيدة اللى محدش يقدر ياخدها منك .. حتى لو اتسجنت او اتعذبت او اتحددت اقامتك واتصادرت افكارك .. تقدر تدندن اى مزيكا جوه تلافيف عقلك .. الأغنيه عندى تساوى الحرية .
***
التقدم رائع .. لكن بيفسد معنى الحياة البسيطة التلقائية .. بشتاق لقعدة البلكونه أو الشباك رغم الحر الافح وبكرة طراوة التكييف الإصطناعية .. وبحب مية (القلة) الساقعة رغم نقاء الفلتر وبرد التلاجة الازع .. حتى ويندوز 98 العتيق بكل مشاكله وتهنيجاته .. فضلت لسنوات طويلة بفضله  عن أى ويندوز أحدث .
***
ليه بنصر على إطلاق أفضل أسماء رموز تاريخنا على أسوأ منتجات مصانعنا ؟ هل إطلاق إسم (كليوباترا) على أسوأ سجاير فى مصر و (سقارة) على أسوأ بيرة مجرد مصادفة ؟
***
البعض يكتب الشعر من قلبة .. والبعض يكتب الشعر لأجل المال .. ولأجل العيال .. ولأجل أى حاجه أخرها (أل) 
***

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: