>قصة حب محمد وسناء

>

الصورة دى أصبحت مشهورة جدا فى كل مكان على الفيس بوك ، فى البداية إنتشرت ببطء وقعدت تنتشر وتتوغل وتستمر لحد ما لقيتها موجوده على معظم (حوائط) أصدقائى على فيس بوك .

الصورة عبارة عن ديزاين بالفوتوشوب لولد وبنت تقريبا فى اوائل العشرينات مع شوية جمل حب وغرام من نوعية : بنحب بعض أه بنموت فى بعض جدا … الخ

طبعا لا يخفى على أى حد إن العبارات ركيكه والديزاين أقل ما يوصف بيه أنه متخلف ، ناهيك إن صور الولد والبنت تدل على إنهم من مستوى إجتماعى ومادى أقل من المتوسط .. كل ده أنا فاهمه وعارفه كويس جدا .

المشكله كلها كانت فى كمية التعليقات الساخرة من الصورة اللى شوفتها عند معظم أصدقائى وقرايبى على الفيس بوك ، واللى حسستنى إن الولد والبنت دول أجرموا إنهم فكروا يتصوروا ويعملوا ديزاين للصورة بتاعتهم .. وكإن  إحنا بقينا من كوكب تانى وإدينا لنفسنا الحق نحاكم الولد والبنت دول على إحساسهم بالفرحه وتعبيرهم عن فرحتهم بالوسائل المتاحه فى إيدهم .

الإخوة الأفاضل اللى مش عاجبهم ديزاين الفوتوشوب ، هل فكروا فى (محمد) اللى بيظهر فى الصورة وهو بيقتطع مبلغ كبير من يوميته فى الشغل علشان يدفعهم لمصمم جرافيك مبتدىء علشان يعمل له التصميم ده ؟ هل فكروا ولو للحظه فى محمد وهو بيحاول يتعلم الفوتوشوب علشان يعمل صورة ليه هو وحبيبته وإن الصورة اللى مش عاجباكم  دى هى أقصى حاجه وصله لها فلوسه أو قدرته على التعلم ؟

البنات اللى وقعت على الأرض من كتر الضحك لما شافوا صورة (سناء) البنت اللى بيحبها محمد هل فكروا ولو لثانية واحدة إن سناء بنت أجرأ من كتير منهم ؟ سناء وافقت تنشر إسمها وصورتها مع حبيبها ، فى وقت  بتتكسف نات من اعلى طبقات المجتمع إنها  تصرح بإسمها نفاقا لمجتمع غبى بيعتبر إن إسم المرأة عورة ؟

سناء قررت تنشر صورتها مع الولد اللى بتحبة بينما جروبات ومواقع وتنبيهات متخلفة كتير بتطلع تقول إن غلط وعيب وحرام البنات تنشر صورها على الفيس بوك خشية على الرجال من الفتنة والإغراء .. سناء رغم كل دعوات التخلف والرجعيه فى مجتمعها قررت انها تنشر اسمها وصورتها علشان بتحب محمد وعلشان عاوزين يعملوا صورة صغيرة تجسد قصة  حبهم الرائعة من وجهة نظرهم البسيطة كان إيه جزائهم فى النهاية ؟

الجزاء كان إن صورتهم تكون مسخرة ومألسة الفيس بوك ، وصورة نستمتع واحنا بنحطها على الوول بتاعنا عشان نبين للناس اننا راقيين وبنسخر من الناس (البيئة) اللى فاكرين نفسهم بنى أدمين واللى فكروا – ياللهول – يتصوروا كام صورة ويركبوهم على الفوتوشوب مع شوية كلمات تعبر عن حبهم … ازاى يفكروا فى كده ؟ هما بنى أدمين زينا ولا إيه ؟

لكن الناس الهاى كلاس لما نيجى نعبر عن حبنا بنعبر عنه بإسلوب راقى .. تصميمات جرافيك عند مصورين محترفين .. كروت فرح بمية الدهب ومكتوب الحرف الأول من إسم العروسة علشان عيب نكتب إسمها (شفت بعينى الحكايه دى فى اكتر من كارت دعوة لفرح لناس راقية) .. وغيرها من الأساليب الراقية فى التعبير عن الحب

لكن  تعبير الهاى كلاس دول عن حبهم بالاساليب اللى قولت عليها بيفتقر لحاجه مهمه جدا .. حاجه إسمها العفوية .. إنك متكونش مضطر تسلم صورك لمصمم فوتوشوب علشان يشيل عرق التوتر ويرسم على شفايفك إبتسامة أوسع ويحسن من عيوب بشرة خطيبتك .. إنك متكونش عامل حساب للناس ورد فعلهم ومنظرك قدامهم لما تيجى تقول للبنت اللى بتحبها انك بتحبها .

محمد وسناء معملوش أى جريمة فى حياتهم غير إنهم عبروا عن فرحتهم بأقصى إمكانيات فى إيديهم ، ومش ذنبهم إن الإسلوب ده معجبش السادة الأفاضل ملوك الرومانسية والحب رواد الفيس بوك ، واللى بدورهم هيظهر حد بيعرف (يتمنظر) أحسن منهم ، وميبقوش يزعلوا لما يلاقوا صورهم نازله على الفيس بوك مع تعليقات من عينة

Loooooool

أو

Very coooooool

12 Responses to “>قصة حب محمد وسناء”

  1. ghada mOhsen Says:

    >بجد بحييك على إثارة الموضوع ده يامحمدأنا الموضوع دة إستفزني جدا وهاجمت كل من إستهزأ بدةلأن بكل بساطة مش من حقهمهي كده أحيانا العفوية تتقابل بالإهانة والإستهزاء والتعاليبجد يسلم قلمك وعقلك^_^

  2. فتاه من الصعيد Says:

    >طبعا معاك بس على فكره دي صوره ولد ومتركب عليها الفستانيعني الصوره لولد واحدركز كده وشوفبقينا بلد الفوتوشوب :)تحياتي

  3. Saleh.Mohamed Says:

    >بص يا عم الحاج انا متفق معاك تماماً فى اللى انتا قلته عن العفويه و الحب الخ..بس معلش..فى مليون سبب يخلى اللى عملوه ده هبل..و فيه مليون سبب يخليهم يستحقوا اللى حصل فيهم و كل الـLoLوالـVery Cool اللى صابهم..يمكن مش هاقدر اذكرهملك لانهم مش فى دماغى دلوقتى ولا الموضوع كان شاغلنى بالدرجه.. بص يا عم كلنا غلابه بس البحث عن الجمال و تذوقه مطلوب لو عايز تنشر شىء ما لازم يتوافر فيه اقل قدر من التناسق..و الا بقا انتا بتشجع محمد لما يروح يسجل اغنيه تكتك بـ700 جنيه فى استوديو فى اوضه فبيت واحد صاحبه..انتا عارف الاغانى اللى عبارة عنLoopمتكرر مع كلمات من طراز : اطلع فى الجمعيه و اقطع ورقه بميه نوصل للعالميه..قول يا حسينى قول ..سمعهم كده على طول….لو انتا شايف الكلام ده عفويه مش تلوث فاسمحلى!ثم حب ايه و هباب ايه يا عم الحاج..يؤسفنى ابلغك ان الطبقه اللى تحت معدومه الدخل دى – وانتا عارف – بتدور على حاجتين مافيش غيرهم : الاكل و الجنس..و انا عمرى ماكنت مع الرأى ده الا لما قعدت لوحدى فى منطقه مش راقيه فى عين شمس و عشت مع ناس هما نسخ كربون من محمد و سناء..انا عايش مابينهم فمتفكرش ترد و تقول انك تعرف اكتر منى..و فى مثل بيقولك من خرج من دارة اتقل مقدارة..و انا مع المثل ده قوى..لو عاوز تلبس تيشيرت مكتوب عليه بالانجليزى..روح اتعلم انجليزى الاول..بدل ما تلبس تيشيرت مكتوب عليهI'm A Bitchلان الدنيا مبقتش بسهوله تجنب تيشيرتات الـDonkeyكمان لما تحب ترفع صورك على الفايسبوك شوف وسط الفايسبوك ده هيستقبلها ازاى..مجتمع الفايسبوك و الانترنت عموماً جمهور زيه زى اى جمهور..لما تعرض عليهم بضاعتك اتأكد انها لو كانت تالفه او فيها اى عيب هيسلخوك

  4. Anonymous Says:

    >أنا أول مرة أشوف الصورة، لكن لي تعليقين- محدش طبعا يقبل بالإستهزاء بمشاعر الأخرين، بغض النظر عن مستواهم أو أي شيء آخر.- الصورة والمكتوب عليها يدل على ضعف التربية اللي الشباب بيترباها، وان البنات بقوا وشهم مكشوف.

  5. Kontiki Says:

    >انا شفت الصورة و اول ما فكرت انه ازاى صورة تتسرق او تتنشر بدون اذن اصحابها بسهولة كدة ومن غير رقيب من ضمير او غيرة ؟!! دلوقتى انت بتقول وافقوا على نشرها !! هل دة حقيقى بالنسبة لى الصورة مكنتش مثار للسخرية بالعكس للبكاء كم من جميلات ناجحات لا يجدن الحب ولا السعادة ولا قلب صافى بجدعاوز الحق من الاخر يعنى بصراحة انا لما شفت صورتهم قلت ياريتنى كنت هى😦

  6. على باب الله Says:

    >النخبة بتاعتنا – او العالم اللي بيقولوا على نفسهم كده – للأسف مش فالحة غير في التريقة على كل حاجة .. و الغريبة انها بتاكل عيش زي الفل من المجتمع اللي بتتريق عليه ده و يمكن علشان كده معندهاش اي حماس للإصلاح

  7. كيــــــــــــارا Says:

    >انا بدخل الفيس بس مش شفت الصورة دي خالص وفيها ايه لما يقولوا بنحب بعضكفايه انهم بيعهلونها في غيرهم دافن نفسه في التراب

  8. samamasr Says:

    >أنا بعتذر لحضرتك، الصورة لخطيبين أو لزوجينبعتذر فيه دبلة ومحبسوممكن ميكونش مهم:) الموضوعبس..قصدي التعليق مني وقصدي موضوع الصورةعاوزة أقول علشان لو حد علق تعليق، ياريت محدش يحكم لأن انا ملاحظة الدبلة ومحبس الخطوبة ..أو الفرح .مش مهم الموضوع مني التعليقأنا قصدي بستعليق على حاجة تانية خالص!بس أتمنى حضرتك متتضايقشوآسفة، فيه حاجة مكنتش هعلق وشفت الملف فبعت لحضرتك رسالة أتمنى حضرتكم متتضايقش من وجهة نظري في نقطة معينة__المهم انا النقطة اللي قصدي أعلق عليهاهي بعيدة عن الموضوع!فكرة إن البنت تقول اسمها على الانترنت أو لأهو من حق أي بنتممكن متذكرش اسمهامفيهاش مشكلةمش موضوع أو مشكلة عورةلكنالانترنت، الفكرة اللي فيه، اللي شايفاها شخصياانك بتعبر عن رأيك فعلا أيوةلكنه عالم, زي الشارع بتمشي فيهبعتبر الانترنت زي دهشارع ةوبمشي فيه وبدخل كل محلأتفرج على شيء معروضهو فكرة أو وجهة نظروأعمل لنفسي محل مثلا، أعرض فيه وجهة نظريالفكرة إنه المحل دهوطول ما أنا ماشية في الشارع مثلا، وبقابل وجهات نظر مختلفة أو يدخلي حد المحل أو أدخل محل حدزي مدونة أو معرض لعرض وجهة النظرفالشارعفيه كل الناسمشكلته إنه فيه كل الناسأي حد بيمشي في الشارعفممكن فعلاندخل نت لعرض وجاهت نظرنانعمل معرض لأفكارنا، وعاوزين نتشارك مع ناس لها أفكار أو ثقافات أو تفكير معين،أفكار بسفمش مشكلةإن حد يساهم أو يشارك باسم مستعارأو يحافظ على اسمه علشان الخصوصيةهي مش مشكلةومتعتبرش إن ممكن يكون الإنسان تفكيره ضيق او حاجةبالعكسممكن يكون متفتح جدا في التفكير وشايفها بالشكل دهفمن حق أي حد يحافظ على خصوصيتهبدون ما نشوفهاانه مذكرش الاسم او الصورة بالنسبة للبنات اللي بتشارك بآرائها على النتانه فيه شيء غلط، في التفكير وقتهالأمن حق أي حد يحافظ على خصوصيتهمش فكرة إنها عورةفكرة، إنه كل إنسان، مش بيتعرف على اي حد في الشارعوالانترنت، شارع واسع، بنمشي فيه،نقابل افكار وآراء ومعارض:) وبنحافظ فيه على خصوصيتنا برضه:)وبرضه انا ملاحظة ان هما عروسين ربنا يوفقهم علشان الدبل:)

  9. قهوة بالفانيليا - شيماء علي Says:

    >أنا بس متحفظة على الناس اللي بتهزأ بمشاعر الآخرينانا ماليش تعليق على الصورة و لا على اللي بيحبوا بعض انا ليا تعليق على ادابنا كمصريينالتحقير عيبو الاستهزاء عيبمش عارفة اخلاقنا راحت فين

  10. z2tota Says:

    >تصدق انك محترم لان فعلا كذا حد من اصحابى ضافها وتاج وهئ هئ وهؤ هؤ ويايوكان كل افراد الشعب المصرى بقوا من الطبقة الارستقراطية ومشافوش كدة ف حياتهمغير كومنتات التأليس على خلقة شريفة"أتعيب الخلقة ام تعيب الخالق" ووارد ان تكون الصورة متزودعليها كلام وحركات من شخص "محترم"او مشولما جيت اعترض اتعاملت على انى حد مش لذوذ ولا طعم اخر حاجة ومش بيعرف يهاف فنبس الحمد لله ملقتنيش لوحدى كدة

  11. hanen Says:

    >جرا ايه يا جماعه انتو بتتكلمو بجد ولا بتهزروا الصوره دي لا محمد يعرف سناء ولا سناء تعرف محمد اصلن و الي عملها جاب اي صورتين و ركبها لو لاحظتو ده و الي يقولك احنا ناس متخلفين عشان مش بنخلي البنات تحط صورها فعلن احنا ناس متخلفين عغارف ليهعشان خايفين حد يشوف بناتنا عالنت و ياخد صورتها و يكربها زي ما انت شايف بس بطريقه افظه و على صوره ابشع و كمان بتقول متخلفين عشان البنت المرتبطه مش بتخلي حد يعرف اذا كانت مرتبطه ولا لا لانها بتعمل حاجه غلط و الا كانت حطته في النور و الله و الله يا جماعه لا في محمد ولا في سناء و كفايه الهجص الي انتو عاملينه على البيك دي اصلن و مش عايزه ادخل في تفاصيل الموضوع الي اتقال اكتر من كده لاني فعلن اتعصبت الادب و الاحتلرام و الذوق و الحياء بقى اسمه تخلف بجد عظيمه يا مصر بنستعر من نفسنا كاناس شرقيين عايزين نعيش عيشه الغرب

  12. Amrixor Says:

    >كل اللي أقدر أقوله لكيسلم البطن اللي حملتك 9 شهورو تسلم إيديك اللي كتبت الموضوع دهانا لسة شايف الصورة علي بروفايل صاحبيو طبعاً ولا 50 تعليق تريقة عليهم و علي ظروفهم المنيلة اللي ملهمش يد فيهاو الله بجد في شيزوفرينيا رهيبة في المجتمعفإستفزتني الصورة .. و بأكتب في جوجل محمد و سناءلقيت تدوينتكفياريت تنفذلي طلب هأطلبه منكانك تشيل الصورة و اذا حابب تحط الصورة حطها مصغرة جداً بحيث متبقاش واضحة المعالمو أخيراً انا محظوظ و يشرفني اني وصلت لمدونة صاحبها بالدماغ دي

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: