>فؤش

>

حكالى أهلى  إنى لما كنت طفل  دخلت معاهم محل شرايط كاسيت كبير .. كانوا بيدوروا على ألبوم مش فاكرين لمين .. كل اللى فاكرينه انى مسكت فى ألبوم معين و(شبطت) إنهم لازم يشتروه .. وبعد مماطله إشتروا الالبوم … اللى مش عارفين هما جايبينه لمين اصلا لثقتهم انى فى سن ملوش فى سماع الاغانى اساسا … كان الألبوم ده هو ألبوم (فى السكه) لمحمد فؤاد …

الكتابة عنه – هذا المولود فى نفس يوم وشهر ميلادى –  كانت ولازالت تحدى مؤرق لواحد زيى – المفروض – إنه إتعلم مع الوقت والخبرة إنه مفيش حاجة إسمها (مش عارف أكتب) … خليك واثق إن الحاجات اللى بتقراها دلوقتى اتكتبت وإتمسحت ألف مرة ، وبنسبة كبيرة مش هكون راضى عن النتيجة النهائية … لإنى مش بعرف أكتب عنه …

لو إنت متذوق جيد للموسيقى وعندك شوية موهبة فى الكتابة هيكون سهل تتكلم عن محمد فؤاد كمطرب كويس وشخصية أثرت – ولازالت –  على جيل كامل من الشباب . ولو إنت صحفى فنى أو ليك علاقات فى الوسط الفنى واتعاملت عن قرب مع محمد فؤاد وجربت طيبة قلبة وشهامة ولاد البلد اللى فيه هيكون سهل تكتب عن كل ده .

لكن مشكلتى مع محمد فؤاد إنى مش بعتبر نفسى متذوق جيد للموسيقى (مش متخصص فى المجال وحكمى كله عباره عن كلمه حلو او وحش للأغنيه مش اكتر ) بالإضافة إنى مليش معرفة شخصية بمحمد فؤاد رغم شغلى فى مجال الصحافة . لكن الغريب إن رغم كل ده بعتبر نفسى عارف محمد فؤاد كويس جدا وبشكل شخصى رغم إننا متكلمناش ولا اتقابلنا ولا مرة واحدة .

على الصعيد الشخصى ، محمد فؤاد كان موجود هناك .. عند كل منعطف وزاوية فى اركان حياتى .. ليا مع كل موقف من مواقف حياتى أغنيه تفكرنى بالحدث ده

محمد فؤاد هو مثال حى لشخصية إبن البلد المصرى بكل ما تحمله الكلمة من معانى ، بدايه من جسمة التخين اللى يحسسك إنك قدام شخص (تختوخ) وطيب مش مطرب وازن نفسه بالجرام ومبهدل نفسه فى (الجيم) علشان يظهر قدامك بصورة معينة ..

شتاء 1994 …شتاء الانكسار .. كنت أيامها واثق انى مختلف عن اقرانى ، واختلافى كان تاعبنى اكتر ما مريحنى .. مين وقف جنبى غير محمد فؤاد ؟ مين غيره غنالى (نحلم) كإنه بيغنيهالى انا لوحدى دون كل البشر؟ وفى وقت كان الأهل بيتباهوا إن عيالهم مش بينامو غير على صوت خُطب مشايخ التطرف الدينى .. مكانش بيجيلى نوم غير على صوت محمد فؤاد فى البوم (فى السكه) .

نظرة عينية الى بتجمع بين الطيبة والذكاء فى نفس الوقت .. تقطيب جبينه لما يفكر أو يركز فى حاجه .. الحركة الاإرادية لما بيمسح شفايفة بلسانه كعادة بعض الناس لما تعوز تقول حاجه مهمة .. نبرة صوته الخشنة الجامعة بين الرجولة القايمة على الإحترام وطيبة القلب فى نفس الوقت . العيون الصغيرة الناطقة بالصدق فى كل نظرة .. والشعر الخشن اللى شعر أى حد من صحابك ممكن يكون أحسن منه .. محمد فؤاد بنى ادم طبيعى مش عامل الف عمليه تجميل قبل ما يظهر على الشاشة .

  صيف 1996  … الإسكندريه .. تحديدا شارع خالد ابن الوليد الممتد الممتلىء بالحياه .. فاكر كلمات (فاكرك ياناسينى) شغاله فى كل المحلات والناس فى الشوارع زى متكون فى كرنفال لحب الحياه … وانا وسط كل ده شايل العدد الجديد من (رجل المستحيل) وراجع البيت بسرعه عشان الحق اقراه … مجرد لمحه بسيطه متهمش حد لكن بالنسبه لى مع صوت محمد فؤاد بقت مهمه جدا .

الفيديو كليبات اللى بيعملها محمد فؤاد رغم ندرتها إلا أنها بتعلم بشكل رهيب مع الجمهور … مين يقدر ينسى الحب الحقيقى لما إستعمل فؤاد الأطفال لأول مرة كعنصر من عناصر الفيديو كليب ؟ مين ينسى (نطرة) فؤاد وهو واقف فى البلكونه سرحان لما امه طبطبت عليه فى (انا لو حبيبك) ؟ مين ينسى اللوكيشن الاكتر من رائع فى (فاكرك يا ناسينى) ؟ لاحظ ديما استعمال فؤاد لاماكن تصوير عادية جدا .. مش بيروح فرنسا ولا تركيا ولا حتى شرم الشيخ .. بيستعمل اماكن انا او انت أو ألف واحد تانى  اتمشينا فيها اكتر من مره قبل كده ..

صيف 1999 … القاهرة … لما تأكدت من حقيقة رسوبى فى الإمتحان اللى مفتحتش المنهج بتاعه من أول السنه .. وقبل ساعه واحده من الإمتحان .. رميت الكتب على الأرض وسمعت أغنية (للوهم لا) لمحمد فؤاد .. بعد ساعه واحده كنت بحل واحد من أسهل الإمتحانات فى حياتى رغم انى معرفش حاجه عن المادة … بشكل أو بأخر بعتبر محمد فؤاد (أدرينالينى) الخاص جدا .

 الموديلز اللى بيطلعوا مع محمد فؤاد مجرد بنات عاديه ممكن تكون جارتك او حبيبتك او حتى اختك .. على عكس باقى المطربين اللى بيجيبو موديلز متحلمش انك تعرف حد فى نص شكلهم اللى بيكون ديما نتاج عمليات تجميل ونفخ وشفط و .. الخ ناهيك عن انك تقدر تشوف كليب محمد فؤاد قدام أهلك أو خطيبتك عادى جدا بدون أى شعور بالإحراج .

شتاء 2001 … نسخت ألبوم محمد فؤاد (كبر الغرام) على شريطين تانيين علشان الألبوم الأصلى اتقطع من كتر تكرار أغنية (كبر الغرام) … كقاعدة عامة بقول للجميع إن اللى عاوز يعرفنى بشكل افضل يسمع (كبر الغرام)  و (اوقات يادنيا) لمحمد فؤاد … الأغانى دى اتغنت ليا انا وبس .

محمد فؤاد مش (بيتنطط) على جمهورة ولا على زمايله .. من أكتر المطربين اللى بيسيبوا المسرح وينزلوا يغنوا وسط الجمهور .. لا حرس ولا بنات بتترمى تحت رجليه ولا ناس بتفتح بعد ما كانت عمياء لما تشوفه .. جمهورة من الولاد والبنات والرجال والنساء .. مش مقتصر على طبقة المراهقين والمراهقات .. هدومه مش ملفته  للنظر أو الوانها فاقعة ومش بيعمل تقاليع فى شكله (رغم حرصه على عمل نيولوك كل فترة) .

صيف 2010 … ألبوم بين ايديك بعد غياب تلات سنين .. مازال محمد فؤاد قادر على التربع على القمة .. الفتى اللى (مشينا) معاه (فى السكه) علشان (نحلم) وميبقاش حد فينا (حيران) واللى معاه دخل (الحب الحقيقى) لـ (قلبى وروحى وعمرى)  دلوقتى بس بيقول لجمهورة (أنا بين إيديك) .. دلوقتى بس بحس انه وصل لقمة نضجة الفنى وعطاؤة … مزج الإحترافية بالإحساس .. الدقه الفنية بطيبة القلب ..

من الأخر … ممكن نختلف أو نتفق حوالين محمد فؤاد .. لكن لو عاوز تسمع شاب مصرى .. بيغنى مصرى وبيحب مصرى وبيكره مصرى وبيتقمص مصرى وبيهجر مصرى و(بيردح) لحبيبته بالمصرى … ساعتها بس هنصحك تسمع لمحمد فؤاد ولا شىء أخر سوى محمد فؤاد .

إنتهى الموضوع .. ومازلت غير راضيا عما كتبت .

محمد حمدى

7 Responses to “>فؤش”

  1. Kontiki Says:

    >فؤاد وتقريبا معظم المطربين المصريين تلاقى فى الالبوم بتاعهم اغنية واحدة مثلا تعجبك بس كل مرة بيكون فى اغنية مرتبطة معاك بذكرى معينة

  2. عـلا - من غـزة Says:

    >التدوينة كتيير متعة .. ودسمة .. حبيت فيها خلطك ما بين الاغاني وذكرياتك عنها .. مش بسهولة لما تلاقي اغاني تعبر عن مختلف حالاتك .. وبالذات الي ملهاش علاقة بالحب والخصام الخ الخاوقات يا دنيا من احلى الاغاني في وجهة نظري لمحمد فؤاد .. عشان بتحكي عن صراعنا الدائم معاها وفي محاولات فهمها الله لو نرضى .. اكيد انت نسيت تتكلم عنها .. الاغنية هادي بردو حكيمة جدا وبسيطة في نفس الوقت في الالبوم الجديد .. ساعات بشتاق تحفة فنية .. بتاخدك وتوديك للماضي ولحظات موجودة في قاع الذاكرة وعليها كوم غبار .. بتخليك تبتسم وتعيط وتقشعر في وقت واحد محمد فؤاد مش المطرب المفضل عندي .. لكن هاتلاقيني منزلة على موبايلي اغانيه القديمة , حيران , فاكرك, .. واغانيه الجديدة.. وهي هادي الميزة فيهتحياتي

  3. sony2000 Says:

    >اولا انت كتبت حلوومهما الواحد هيكتب موش هيرضي عن اللي كتبوثانيا مين اللي مسمعهوش او محش بصوتو وبكلماتوديما قريب منناوسواء اتفقنا ام اختلفنا عليه….بس في نوعيه مغنين بيأثروا اوي مع الناسوانا بالنسبالي هما اتنين….فوش والكينج بس:)تحياتي

  4. dandana Says:

    >:)محمد فؤاد مطرب ان ماحبتهوشماينفعش تكرههمش هاتصدق..أو هاتصدقبس انا بقالى فترة عندى حالة من الحنين لكل اغانى فؤاد القديمة مع انى ماسمعتش آخر 3 ألبومات له مثلا بذمةبس اغنية فاكراك يا ناسينى اللى انت بتتكلم عنها دى بالذاتانا حاسة ان صوت محمد فيها..منتهى منتهى الوضوح والنضججت على بالى فجأة وانا بكلم صديقوفجأة برضو افتكرت قد ايه كنت بحب تصويرهاوخصوصا الحماموورش الرسم اللى بين الاطفالوالحياة جواهاوقولتله نفس الكلمة بتاعة ان بيصور فى مصرالقاهرة القديمة الشوارعكل الاماكن اللى احنا دلوقتى بنحاول نكتشفهااغنية لو اللى كانت هادية اوى مع ان لو الواحد ركز فى كلامها هايلاقيه من حد موجوعبس هو غناها بكل رواقة كأنه بس بيفضفضمن غير عويل ولا زعيقاوقات يا دنيا..ماعنديش تعليق عليهابس لو شوفت الإستاتيو بتاعى ع الفايس هاتعرف ان فؤاد بجد واخدنى تماما الفترة دىهانساك فاكرهاطب والله دى آخر مرة أشوف فيها علا غانم بالبراءة دىوهو نفسه مهما كان موجوعتحس انه برضو بيغنى/بيتكلم بحبة كبرياءحتى لو كانو فتافيتلما إدى بوكيه الورد لأتنين ماشيين فى الشارعوبعدين راح لعب طاولةيانهار أبيض على البساطة الجذابة على العمومانا مبسوطة انى قريت البوست دافى الوقت دا بالذات

  5. dandana Says:

    >اه اهنسيت اقولكفاكر اغنية يارباللى هى كل اتنين ع الحب حبايبقربهم وماتبعدهمشكل جيران وأصحاب وقرايب جمعهم ماتفرقهمشواللى فى قلبه عذاب أو جرح طيهولهواللى مادقش الهنا والفكر..دوقهولهفاكر تأثيرها كان عامل إزاى اول مرة سمعتهايانهااااار ابيض على فؤش:D

  6. وشوشات Says:

    >سمعت ألبوم حالمبو أو خفة دمه؟ الإسمين لألبوم واحد على فكرة. لو ما سمعتوش يبقى انت ما سمعتش صوت محمد فؤاد في انقى فتراته و أحلى أوقاته. الألبوم قديم أوي و شعبي أوي، إنما لازم اسمعه من وقت للتاني.. اللي ما سمعش حالمبو يبقى ما سمعش محمد فؤاد.

  7. إبتسام مختار Says:

    >لا التدوينة جميلةو قالت كتير من اللى عايزه اقولهمحمد فؤاد هو رمز للفنان المصرى بجدكفايه كليباتهغير انها متصورة فى مصرو مش مصر شرم الشيخ بسلا متصورة فى مصر البسيطة العادية بتاعت كل الناسغير دهكفايه القصة اللى فيهاتحس انك بتتفرج على فيلم مش على كليبزى كليب انا لو حبيبكو لو عايز تفتكرنىمعظم أغانيه بكلماتها بألحانها بتودى لزمن تانى متعرفش عشته امتىفنان رائعو أروع ما فيه بساطته

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: