>أسماء

>

لإنى من أشد الناس إيمانا بإن أسمائنا رغم إنها من الأشياء اللى إحنا مخترناهاش إلا أن ليها تأثير كبير على شخصيتنا وتصرفاتنا ، وإن أسماء الناس اللى نعرفهم بتحدد جوانب خفية فى علاقتنا بيهم ، ومثلا على سبيل المثال صعب تتخيل شاعر إسمه (مخيمر) أو مطرب إسمه (عباس) ، وفى نفس الوقت صعب تتخيل سباك إسمه (شهاب) أو مبيض محارة إسمه (أسر) … الخ
بالتالى جربت أعمل ربط بين الأسماء المتكررة بين صديقاتى البنات العزيزات اللى عرفتهم على مدار حياتى وبين علاقتى بيهم … وكانت النتيجة مذهلة …
  • البنات اللى اسمهم (إيمان) و (منى) هما أقرب ناس عرفتهم فى حياتى ، أى بنت إسمها منى أو إيمان بكون واثق إن علاقتى بيها هتكون غير تقليدية وإن صداقتى بيها هتكون صداقه قوية ومتينة ومستمرة لفترة طويلة .

  • البنات اللى إسمهم (إيناس) أو (دعاء) بتكون علاقتى بيهم مبتورة متوترة متقلبة مليئة بالتقلبات والحيرة والتوتر وديما نهاية علاقتى بيهم بتيجى فجأه نتيجة موقف سخيف أو أزمة عابرة . أستثنى من القاعدة دى بنت واحده اسمها ايناس وبنت واحده إسمها دعاء بعتبرهم من أفضل أصدقائى .

  • البنات اللى اسمهم (مروة) و (نهى) و (أميرة)  ديما طيبين ومحترمين وهاديين ، وديما علاقتى بيهم بتاخد منحنى ثابت من الرضا المتبادل والحب الأخوى الهادى . وأفضل زميلات دراسة كانوا بالأسماء دى ، وأحسن مناقشات فكرية هادية ومحترمة ومتزنه كانت مع ناس بالأسماء دى .

  • كل البنات اللى إسمهم (شيماء) علاقتى بيهم زى الزفت ، شد وجذب وخناقات وحرق دم وإتلاف أعصاب متبادل .. إسم شيماء بالنسبه لى يعنى علاقه على نار حامية .. بفكر مرتين قبل ما أتعرف على بنت بالإسم ده بعد ما مريت بتجارب دامية سابقة ، وأستثنى من القاعدة دى بنت إسمها شيماء بعتبرها من أفضل أصدقائى .

  •  كل البنات اللى اسمهم (إنجى) و (ياسمين) أشقياء وعفاريت وعنيهم بتطق شرار من كتر الحماس ، قلبهم أطيب من العصافير وبيحبو الحركة والتنقل والشقاوة … حقيقة علمية 

  • كل اللى اسمهم (غادة) مغرورات بشكل أو بأخر … وعلاقتى بيهم بتاخد منحنى منخفض بيبدأ قوى ويقل مع الوقت … حقيقة علمية برضو .

  • كل اللى اسمهم (هند) و(منه) دلوعات عسولات قمرات ومن أحسن واقرب الناس اللى عرفتهم فى حياتى .. وفيهم حيوية وانطلاق وحب للحياة وبيقدرو يغيروا المود بتاعى تماما لما اكون معاهم .

  • البنات اللى اسمهم (سارة) كتير جدا جدا جدا .. واضح إن الناس اللى اتجوزو فى منتصف الثمانينات حتى أوائل التسعينات مكانوش بيعملوا حاجه غير انهم يسموا بناتهم باسم (سارة) …علاقتى بالبنات اللى اسمهم (سارة) بتكون متقلبة .. شويه صداقه قوية وشويه جفاء شديد .. كل اللى إسمهم (سارة) منغلقات متحفظات

ملحوظات صغيرة :
  • الإنطباعات دى شخصية جدا ، والموضوع اقرب للهزل منه للجد عشان محدش ياخده بجد ويقفش ، وأكيد أنا أكبر من إنى أقيم علاقتى بحد على أساس إسمه .. هى مجرد ملاحظات طريفة .

  • جربت أعمل نفس الموضوع على صحابى الولاد لكن التجربة فشلت .. إكتشفت إن كل صحابى الولاد المسلمين اسمهم احمد ومحمد ومحمود وكل المسيحيين إسمهم مينا ومايكل وميشيل !

  • الإنطباعات دى خدتها بعد معرفة أكتر من 3 بنات بنفس الإسم .. متسألنيش عن رأيى فى بنات بإسم (شيرويت) أو (جومانا) أو (جاكلين) لإنى أكيد معرفش 3 بنفس الأسماء النادرة دى .

  • البنات اللى إسمهم (نجيبه) و(إحسان) و (محاسن) و(نجاة) .. الخ يرجى الرجوع فى المعلومات عنهم للسيد جدك المُبجل – لو كان عايش – لإنى أظن الأسماء دى تم إلغاءها وبيندفع غرامة للى يسمى بنته إسم من دول حاليا .
محمد حمدى

4 Responses to “>أسماء”

  1. sony2000 Says:

    >طب انا جدي توفيارووووووووووووح لميييييييييييييييييين؟؟؟؟؟؟؟:))

  2. Basees Says:

    >موضوع لطيف ويثير التفكير، هل توجد في الحقيقة علاقة بين الأسماء والشخصية؟ مين عارف، يمكنتحياتي

  3. فتاه من الصعيد Says:

    >الله يكرمك يا محمد :)تحياتي

  4. Iman Says:

    >بس طبعا انت متعرفش ايمان غيرى ..ولا اية يا حمدى؟ ههههههههههه

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: