>عن خرفان الفيس بوك !

>

على الرغم من إن جوايا كلام كتير عن أزمه ماتش مصر والجزائر فى ستاد الخرطوم , إلا إن إمبارح بالليل والنهرده كله كان فى حاجه خنقتنى وخنقت ناس كتير جدا على الفيس بوك , عباره عن أبليكيشن تهنئة بعيد الأضحى , بيقوم الأبليكيشن بعمل Tag لكل صحابك على صورة خرفان , مع إضافة إسمك على الصورة قال يعنى إنت اللى عامل الديزاين وإنت اللى عامل Tag لصحابك واحد واحد …

الأبليكيشن لسهولته إستخدمه ناس كتير جدا , وبحسبه بسيطه تلاقى لو ليك 100 صديق استخدمو الابليكيشن ده يبقا إنت اتعملك 100 مره Tag على الصور , ولو فى 10 اصدقاء مشتركين بينك وبين كل واحد من الـ 100 دول يبقا إنت بتتلقى Notifications ممكن يوصل عددها لـ 200 او يمكن أكتر , ده غير طبعا ردود الناس على الصور دى اللى بتوصل على ايميلك او بتظهر فى البروفايل بتاعك , وده حول بروفايل ناس كتير جدا لخرفان طايره فى كل مكان على البروفايل !

كنت بحسب إن أنا اللى انسان مش اجتماعى ومش واخد على تهانى العيد , إلا إنى لقيت ناس كتير مضايقه من الخرفان اللى سرحت فجأه فى البروفايل بتاعها .. مروه رخا حطت لينك تقدر من خلاله تعمل Block للابليكيشن كله الا ان ده مقدرش يلغى استخدام الأخرين له .. بنت مصريه وأحمد شقير وغيرهم على تويتر اشتكوا من نفس الموضوع , ده غير عدد كبير من المستخدمين اللى قالو ان الخرفان دى مخلياهم مش عارفين يتابعوا اى جديد على البروفايل بتاعهم .

بغض النظر عن الخرفان السارحه فى البروفايل بتاعى , انا بصيت للموضوع من وجهه نظر تانيه .. ايه اللى بيغيره الفيس بوك بالظبط فى شخصياتنا ؟ لما ظهر الفيس بوك فى البدايه ظهر كشبكه اجتماعيه بتسهل تواصل الناس وتخلى الحياه والتواصل أسهل بالنسبه لهم وده كان شىء رائع .. لكن مع الوقت حصلت حالة من الإستسهال فى التواصل بين الناس .. زمان فى الاعياد كانت الوسيله الفضلى لتبادل التهانى بين الناس هى تبادل الزيارات والعزومات , مع الوقت التليفونات قللت من الزيارات وخلت الامور اسهل , ثم ظهر الموبايل ورسايل SMS وتقنيات الموبايل الحديثه زى انك تبعت رساله واحده لكل الناس المتخزنه على موبايلك بدل ما تبعت رساله لكل واحد على حده .

ومع ظهور الفيس بوك الامور بقت اسهل وارخص , كام كليكه ورساله ثابته وتبعت رساله لكل واحد من صحابك بالتهنئة وخلاص , ثم بدأ التطور وبدأت تقدر تبعت رساله لعدد كبير من الناس مره واحده .. ثم الموضوع اتطور وتقدر تعمل List لكل الناس وتبعتلهم مره واحده وخلاص .. ثم الموضوع أصبح اسهل وتقدر تعمل Tag على صوره واحده والسلام .

ثم وأخيرا , قمة التفاهه ان فى برنامج هيعمل كل حاجه وهيحط الصوره ويعمل تاج وخلاص وتبقا كده عملت الواجب مع كل صحابك منغير ما تعمل حاجه اصلا … والموضوع مش مقتصر على الاعياد وبس .. ده بدل ما تفتكر تواريخ ميلاد الناس القريبه منك دلوقتى الـ Birthday reminder هيفكرك قبلها بشهر , وغيرها من الابليكيشنز اللى فرغت الحياه الاجتماعيه من اهم حاجه فيها وهى الاهتمام بالبشر ومتعه افتكار الناس القريبه منك رغم زحمة الحياه .. النهرده محدش بينسى عيد ميلاد حد ومحدش بينسى يعيد على حد , ورغم كل ده الصلات الاجتماعيه بين الناس فى تناقص مستمر , حتى صاحبى حكالى ان خاله اللى ساكن على بعد امتار منه استسهل وحوله عيديه العيد على رصيده فى البنك , واختفت عادة مرور الاولاد على بيوت القرايب للسلام عليهم وأخد العيديه اللى بتكون دايما فلوس جديده بتصدرها البنوك مخصوص فى المناسبات دى .

السؤال هو : هل الفكره انك تقول كل سنه وانتم طيبين لكل الناس اللى عندك ولا المتعه الحقيقيه ان التعييد على الناس يكون بجد نابع من جواك ومن اهتمام حقيقى بالتعييد على الناس القريبه من قلبك؟

الشبكات الاجتماعية وشبكات الموبايل والتحويل اللحظى للاموال :  شكرا لانكم خليتم حياتنا اسهل , لكن انتو بتدمروا الصلات الاجتماعيه الجميله بين الناس لإنكم بتخلوا الموضوع (اسهل) يوم بعد يوم

اصحابى اللى بيعملولى تاج على صور خرفان : انا مش بحس انكم بتعيدوا عليا لما تعملوا معايا كده , فا متعيدوش عليا بالإسلوب ده وتزحمولى البروفايل بتاعى لإن لو مش عاوزين تعيدوا عليا من قلبكم وفاكرينى بشكل شخصى يبقا بلاش منه أحسن .

محمد حمدى

14 Responses to “>عن خرفان الفيس بوك !”

  1. ـ-ـ- أحمد عبد العدل-ـ-ـ Says:

    >كل سنة و انت طيب و جميل ، فعلاً الرسالة مالية الفيس بوك بشكل متكرر و مزعج للغايةنمط حياتنا بقى كده فى كل حاجة حتى الأكل و الشرب ،،،، يمكن النموذج مش كله غلط لكن محتاج ناخد بالنا من الحاجات اللى ناقصانا أو بتعبير أدق اللى وقعت مننا عيد سعيد عليك

  2. لماضة Says:

    >هههههههههههوالله عندك حق يا احمدانا حاسه ان الفيس بوك عندي قرب يمأمأمن كتر الخرفان اللى ملتهوعندي حد يكتبلي كل سنه وانتي طيبه احسن الف مره من انه يبعتلي صورة بتاجعلى فكره مسحتهم اغلبهم

  3. kmt Says:

    >السلام عليكم ورحمة الله وبركاتهكل سنة وانت طيب ويارب يكون عيد جميل عليك وعلى كل اللي يحبوكاول زيارة ليابس البوست عجبني جداشكرا تحياتيالى لقاء

  4. لماضة Says:

    >محمد اسفه للغلط في الاسماحمد عبد العدل السببالاسم قدامي على السنبورة

  5. Jana Says:

    >الفكرة كانت سخيفة لأقصى درجة ..والفيس بوك ابتدا ينرفذ فعلا من بعد تجديداته الاخيرة"الفاشلة"

  6. dr.lecter Says:

    >بكره الفيس بوك في المناسبات الاجتماعيه والدينيه عارف ثقافه القطيعهو ده بالظبط اللي بيحصل

  7. واحدة مفروسة Says:

    >انا كمان اتفرست من الخرفان السارحة ديهبس ما يمنعشي برضه اننا نقول كل سنة و انت طيب و عيد سعيدبس على فكرة حكاية الابليكيشن ديه بتعمل فلوس كتيييييييييييييييييييرمن ورا اللى بيبعتهاو للاسف اللى بيبعتها بيفتكر انها حركة لطيفة….لكن بقا انا بفرسهم و مش ببعت لحدانا اروح ازور و اقول كل سنة و انت طيباو اكتبرها عندى مرة واحدة و هيه تروح للكلافرس صح؟؟؟؟؟تحياتي و كل سنة و انت طيب

  8. صفا سارة Says:

    >محمد كنت ناوية اكتب عن الموضوع ده بس انت سبقتنى ومتفقة معاك جدا🙂

  9. فتاه من الصعيد Says:

    >ههههههههمليش في الفايس بوك …. بس اعتقد ان كلامك عن قطع الصلات بين الناس صحالمفروض الغرض من سهوله اتصالنا بالناس تقرب البعيد عننا …. موش تبعد القريبينتحياتي

  10. SostyPasha Says:

    >كل سنه وحضرتك طيب استاذ محمد :)انا بجد بجد بجد اتخنقت اوي من حكايه الخرفان ديابلكيشن ايه الاهبل دا بجدوناس شوفتهم عندهم اكتر من 2000 فريند مثلاوتلاقي عنده البوم اسمه اضحى مبارك وفيه حوالي 200 صورة كلها خروف وكلها شكل بعض بالظبطملهاش معنى ابدا بجد وسخيفة اوي :Sعااااااااااااااااااااا

  11. Phoenix Says:

    >الفيس عموما بعد التغيير اللى حصل .. بقى رخم و غريب جداااما موضوع التواصل للأسف معاك حقدايما بنستخدم اى تطور بالسلب كل سنة و انت طيبو عيد سعيد عليك

  12. bos bos Says:

    >هو يمكن الموضوع زاد قوى عن حده العيد ده بس ده ما يمنعش أنها وسيلة برضة للتعبير أو المعايدةولكنى مازلت مصرة أن كل ده ما بيحسسنيش بالتهنئة زى لما حد يزورنى أو حتى يتصل بيابس نسبة لحياتنا اللى بقت مشغولة على طوووووووووول فبقى البديل رسالة موبايل أو رنه… Read moreبس حتى دى ساعات الناس بتبخل بيهايالا كل سنه وأنت طيب وعيد سعيد عليك إن شاء الله

  13. وومن Says:

    >كل سنةوانت طيب يا محمدايه موضوع الخرفان دة انا موصلنيش ولا خروف بس عندك حق تفكر احنا ممكن نعمل ايه عن نفسي لما ببعت رساله بابقي فكرت في اللي ببعتله وعاوزة بجد اعيد عليه او عليها مش واجب وخلاص

  14. اقصوصه Says:

    >عن نفسي لا جربت الفيس بوكولا تويتربعدني على الام اس انويوم تطورتدخلت عالم التدوين🙂

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: