>باى باى قومية !

>

إبنى .. حبيبى .. نور عينى …

بكتبلك الرسالة دى وهخليهالك تقراها لما تدخل المدرسة , علشان لما تسمعهم فى المدرسة بيضحكوا عليك وبيقولولك إن العرب إخوات , وإن الأزمات بتجمع الإخوة العرب ومش بتفرقهم , وإن مفيش حاجه فى الدنيا تقدر تخلينا نبعد عن هدفنا الأسمى وهو تحرير القدس العتيق … ساعتها بس عاوزك تطلع الرسالة دى وتقراها , علشان متصدقش الكلام اللى هيتقالك ساعتها .

حبيبى أنا بكتبلك الرسالة دى وأنا شايف بعينى البلطجية الجزائريين بيكسروا أتوبيسات إخواتهم المصريين , وبيجروا وراهم فى الشوارع بالسكاكين والطوب , وبيرموا علب التونه والسردين المعفن على الأتوبيسات اللى إزازها إتكسر … أنا عارف إنك بتقول فى بالك : ليه بيعملوا كده علشان ماتش كوره .. وهما اللى كسبوا فيه امال لو كانوا خسروا كانوا عملوا فينا ايه ؟

لكن أنا عاوز أفهمك يا حبيبى إن اللى بيحصل ده مش بيحصل علشان ماتش كوره , اللى بيحصل ده نتيجة حقد دفين فى قلوبهم من أيام رئيسنا الراحل أنور السادات لما قال إنه مش هيخلى كل ولاده يموتو علشان مصالح الدول العربية , ولما تأكد السادات إن كل المواقف اللى أخدها العرب معانا كانت بتصب فى النهاية لمصلحتهم , زى الكذبه الكبيره اللى اسمها قطع البترول عن الغرب اثناء حرب اكتوبر واللى كان الهدف منها زيادة سعرة وليس التضامن مع الشعب المصرى .

ولما عقد السادات صلح منفصل مع اسرائيل , واثبتت الايام صحة نظريته , وإن اللى كان هيعمله السادات بالسلام ايامها مش عارف يعمله العرب ببوس الأحذيه لحد النهرده , ساعتها بس إتجننت الدول العربيه وقررت تطلع احقادها علينا

والحقد الدفين ده مستنى أى فرصه علشان يطلع .. ساعات بيخرج فى مشاده كلاميه بين سواق تاكسى وواحد جزائرى .. ساعات بيطلع فى قاعة دردشة على الإنترنت .. لكن فى كل مره بنقول ده مجرد تصرف فردى ميدلش على إتجاه الشعب الجزائرى كله .

إلا إن اللى انا شايفه دلوقتى بيقول إن الناس دى فى حاجه غلط فى تفكيرها , وإن إخواتنا لا يمكن يسمحو لنفسهم يجروا ورا بناتنا وفنانينا ومثقفينا فى الشوارع فى مطاردات زى مطاردات القط والفار .

اللى حارق دمى كمان حالة الصمت القذر الصادر عن الحكومة الجزائرية , الصمت ده بيشجع المخربين دول على الإستمرار فى تخريبهم , وبيثبت إن الحكومة الجزائرية بتشجع وبتؤيد – إن مكانتش هى اللى دبرت – كل الأحداث  دى .. حتى مفيش لحد دلوقتى أى إعتذار رسمى من الحكومة الجزائرية , حتى الجرايد مخرجتش علينا بخبر واحد يقول إنهم إعتقلوا مثيرى الشغب بعد عودتهم من السودان !

وبما إننا جبنا سيرة الجرايد تعالى أكلمك – ابنى حبيبى –  عن دور وسائل الإعلام فى اللى حصل ده , وسائل الإعلام الجزائريه مسابتش صفحه فى جورنال الا لما صورت لقراءها إن المصريين كانوا بيصحو من النوم الضهر ويغتصبو البنات الجزائريات ويدبحو المشجعين الجزائرين العصر ويدخلوا ينامو المغرب تانى ! ومتستغربش لو عرفت إن الجزائرين صدقوا التخاريف دى لإن الإعلام عندهم منغلق ومحدود ومش مفتوح زى عندنا على قنوات ومصادر تانيه للاخباربنعرف منها الحقيقه علطول .

إذن إعمل اللى تعمله .. اعمل حفله بين محمد منير والشاب خالد .. اكتب فى جرايدك عن الوحده اللى المفروض تكون بين الإخوات , إعزف النشيد القومى للبلدين فى بداية الماتش .. خلى اللعببه تسلم وتبوس وتحضن وتبادل التى شيرتات مع بعض .. اعمل ما بدا لك لانك فى النهايه مش هتقدر تغير 1 على عشره من الفكره اللى اصبحت ثابته فى دماغ الجزائريين إنك مصرى قذر تستحق الموت والتجريس فى الشوارع ..

فقط الدرس الوحيد المستفاد من اللى حصل ده إن القومية العربية ماتت وإندفنت فى يوم اعتداء الجمهور الجزائرى علينا , وكان كفنها شعارات : وحدة الوطن العربى ودفاع ابناؤه عن وحدة اراضيه , والعزاء أقيم فى الشوارع المجاورة لإستاد المريخ فى الخرطوم .. ولا عزاء للعرب ولا شكر الله سعيكم !

وللحديث بقية .

محمد حمدى

8 Responses to “>باى باى قومية !”

  1. زمان الوصل Says:

    >إعلامى وصفوه بأنّه إعلامى كبير علّق على الموقف المحتقن -لا فُض فوه- بقوله : الجزائر بلد ماتتعرفش غير بنسوانها !! طيب و الإعلامى المحترم إيش عرّفه بنسوان الجزاير !! و كيف يصدر عنه مثل هذا القول المشين !! و إذا كنت شايف إن عيب يجروا "ورا بناتنا وفنانينا ومثقفينا فى الشوارع فى مطاردات زى مطاردات القط والفار" طيب مش عيب اللىّ بيتقال فى إعلامنا ده و اللىّ وصل لكلام من عيّنة "عيال بشخّه" على لسان الممثل "محمود عبد العزيز" ولاّ ده من جرّاء الإعلام اللىّ وصفته بأنّه مفتوح !!مستغربه جدّا من انتظارك رد فعل الحكومه الجزائريه بينما لا أعرف حتى الآن موقف واضح للحكومه المصريه غير شوية دبلوماسيات فارغه من عيّنة استدعوا السفير هاتوا السفير ودّوا السفير !! بصراحه مش عارفه طالما حكوماتنا من زمان أوى كده و هى عندها بُعد نظر و فاهمه الفوله من قبل ما تتقشّر مش بتستجيب ليه لكل نداءات قطع العلاقات و إعلان الخصومه بل غالبا ما تكون مثل هذه القرارات من الطرف الآخر مش من طرفها !! ده عشان حكوماتنا قلبها كبير و مش بيهون عليها الأخوّه ولاّ خلف الأكمه ما خلفها زى ما بيقولوا بالنحوى؟يا ريت نسأل عن موقف حكومتنا قبل ما نتساءل عن مواقف الحكومات التانيه أظنّه يبقى أقرب للمنطق

  2. donya Says:

    >صباح الخيراتفلقنا بالقوميه العربيه المهلبيهواخوتنا بيتهانوا في كل بلد عربي شويه ومش اي حد دكاتره ومهندسين ومدرسين ….الخوموضوع الدكتور اللي اتجلد ليس ببعيدان الاوان ان المصري يعيد حسباته من جديد وياكلها بدقه في بلده والا يسافر بره يوم واحدتحياتي

  3. شروق ..مدونة تحت العشرين Says:

    >تسلم إيدك و الله حضرتك قولت المفيديا ريت الناس بتاعة الشعارات الفكسانة و مؤتمرات القمة العربية يفوقوا بئي من الوهم اللي عايشين فيه بلا قومية بلا بتنجان

  4. khalil Says:

    >هذا بكاء عيالالماتش خسرتوه و الحكومة المصرية من خلال حكاية الأعتداءات المزعومة عمّال تلهّي الشعب المصري عن مشاكله الحقيقية(الغلاء توريث الحكم…) نفس السيناريو في الجزائر حيث سينسى الجزائريون لنعض الأشهر البطالة و غلاء المعيشةخليل من تونس

  5. اسامه عبدالعال Says:

    >يابنى انتا اعتدائات مزعومه اىه انتوا عايزيين ايه عشان تصدقوا انهم كانوا بيدبحوا فى المصريين فى السودان

  6. Ebtesam Says:

    >مفيش اعتدائات مزعومهاللى حصل ده مش حاجه مُشرفة عشان نزعم انه حصلو لو عايز تتفرج على الاعتدائات اللى من وجهة نظرك مزعومةتقدر تفتح يوتيوب و تتفرجحقنا راجع بإذن اللهوحسبنا الله و نعم الوكيلنقطة

  7. dr.lecter Says:

    >كرهت الكلام في الموضوع ده وكرهت القوميه العربيه اللي اتحطمت علان مات كوره

  8. عليوه Says:

    >عندك حق لانها مش حكايه جزائر وبس دى حكايه كل الدول العربيه واللى بيحصل للمصريين فيها انا كتبت موضوع عن اللى كان بيحصلى وانا مسافر لارض الثوره والاباء والكتاب الاخضر ليبيا من سنين فاتو موضوع يعبر عن اللى بيحصل لمعظم المصريين خارج مصر ارجو زيارته فى مدونتى

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: