>عاوز نوكيا ؟ إسمع شمس !

>

 
 
لما جبت موبايلى النوكيا E63 بضمان راية , حصل وصادفتنى بعض المشاكل البسيطة .. محبتش أبتكر وأخترع خصوصا إن الموبايل كان لسه جديد , وحبيت أستشير حد متخصص فى المشكله البسيطة اللى كانت عندى … بالتالى لقيتنى رايح لتوكيل راية علشان يشوف الموبايل اللى اشتريته مش شغال مظبوط معايا ليه .

حديثا عن طريقة الكلام والمقابلة والمعاملة .. أحب أقولك إنك لو دخلت هناك على إنك عاوز تشترى موبايل من هناك هتشوف إبتسامه واسعة وترحيب كبير وإجابه على كل أسئلتك .. أما لو كنت رايح تطلب إستشارة أو تصليح لموبايلك الموجود تحت الضمان .. الإبتسامة هتتضائل وهتتحول المعامله لطريقة جافة وكإنك غلطت لما رحت تطالب بحقك اللى إنت دفعت تمنه مقدما مع تمن الجهاز بدون مناقشة .

حديثا عن إسلوب الصيانة فا هو إسلوب أقل ما يوصف به انه إسلوب غبى , الموظفين الموجودين مش بيحاولو يحلو المشكله بقدر ما بيحاولو ياخدو الجهاز ويدوك إيصال وتدوخ فى السؤال على جهازك بعد كده بحجة إنه موجود فى الصيانة , الإسلوب التشددى ده بيخليك تخاف انك تروح هناك لو صادفتك مشكله لانك مش هتتلاقى حل عملى لمشكلتك بالاضافة انهم هيدوخوك لحد ما تستلم موبايلك تانى , رغم ان الموبايل جهاز عملى جدا فى الشغل ومن الصعب الواحد يقعد منغيره فترة طويلة .

بعد 3 ثوانى من النظر لجهازى بص لى الموظف نظرة الواثق من امره وقالى : حضرتك الجهاز فيه فايرس وعاوزين نغير السوفت وير كله .. بعد ما نعمل فورمات للجهاز طبعا .

سالته بدهشه : فايرس ايه ؟! انا موصلتوش للكمبيوتر اصلا ! وفورمات يعنى هتمسح كل المتخزن عليه ؟ ولا انا فهمت الكلمه غلط ؟

حضرتك فهمت صح .. كل حاجه على الموبايل هتتمسح .. وهتستلمه مش بعد اقل من إسبوع علشان نكون لحقنا خلصنا الشغل , وياريت تاخد الشريحه واى حاجه اضافية لاننا مش مسئولين عن فقد أى حاجه مش متعلقه بالجهاز !

حاولت اوضح له وجهه نظرى وانا بقول له :

يا فندم ياريت تفهمنى .. أنا صحفى .. شغلى كله معتمد على الموبايل .. الأرقام اللى معاك دى مينفعش أفقدها .. لإن نصها ارقام فنانين وصحفيين ورؤساء تحرير ومطربين وممثلين !

جاوبنى وكإنه اتحول لمكنة إجابات سخيفه :
ده كل اللى اقدر اقولهولك .. الا لو عاوز نحاول نصلحه هاته بكره بقا ان شاء الله علشان المهندس المختص يكون موجود لانى مش عارف فيه اوى

وإنت مش المهندس المختص ؟ ولو انت مش عارف فيه اوى أمال مين يعرف ؟ هو مش إنت التوكيل الرسمى للصيانه ولا انا بيتهيالى ؟

وسؤالى الأخير مكانش تأليس بقدر ما كان سؤال حقيقى بعد ما حسيت انى فى برنامج مسابقات على شاكلة (الكاميرا الخفية) مش فى مكتب صيانه معتمد من شركة المفروض انها محترمه .

المهم انى فى النهاية قعدت مع نفسى واكتشفت ان كارت الميمورى مكانش داخل بشكل مظبوط فى التليفون وده اللى كان عامل المشكله دى .. لا فايروس ولا سوفت وير ولا فورمات ولا أى حاجه .. كل ده كان استسهال واستغلال من شركة راية

وسط كل الاستغلال ده من شركة رايه .. شائت الظروف انى اتعرف على بنت صغيره وجميله .. اسمها شمس .. قررت انها تقف فى وش كل الكلام ده وتواجه نصب شركة رايه .. يمكن انا مشكلتى صغيرة مقارنة بمشكلتها .. الفارق الوحيد انها قررت تواجه ومتسكتش على النصب .. ووقفت بيافطه تدعو لمقاطة رايه وعملت شبه اعتصام بسيط على سلالم فرع راية فى القاهرة …

كمان عملت شمس على الفيس بوك جروب ضد ظلم شركة راية رافعة شعار : (عاوز نوكيا متروحش رايه) , والصحافة اهتمت بالكتابة عن الجروب ده واللى عدد اعضاؤه بيمثلوا سبه فى حق شركه مش عارفه تحافظ على اسمها المتدهور فى السوق المصرى

مواجهة شمس ورفضها الظلم وصلها لقاعة المحكمه دفاعا عن حقها ومطالبتها بيه .. وبكرة عندها جلسه مهمه فى المحكمه كاولى جلسات قضيتها مع راية , وبتتمنى منكم مساندتها فى قضيتها والوقوف ضد نصب الشركات اللى بتعمل بروباجاندا واصحابها بيعملو ملايين على حسابنا .

انضموا للجروب وساندوا شمس ضد رايه .. واحكو عن تجاربكم مع راية

محمد حمدى

12 Responses to “>عاوز نوكيا ؟ إسمع شمس !”

  1. مخبر قمل دولة Says:

    >ههههههههانا موبايلي جبته من غير ضمان ( كان في فرق 300 جنيه بين الضمان واللي من غيره )ومن ساعتها خايف .. عاوز سنة الضمان تعدي بسلام .. انت شكلك كده هتخليني احمد ربنا انه كان من غير ضمانبس انا شكلي كده هقر عليككل دي نمر فنانين وكتاب و و و:D

  2. محمود مخلص Says:

    >نفس المشكلة دي عند اي خدمة عملاء,زي مثلا لينك دوت نت تلاقي الي بيرد عليك يقعد يقولك اكيد الوصلة مهزوزة شيل الكبل وحطه تاني وكلمني بعد ساعة وفي الاخر يقول مستر محمود هو في مشكلة في النت حاتتحل بعد يوم!!!!!!!!!!

  3. فتاه من الصعيد Says:

    >انا موبايلي موش نوكيا اصلافموش هرووح لحد :)بس دي طبيعه الشركات الكبيره …. النصب على المواطن تحياتي

  4. أليس في بلاد العجائب Says:

    >راية و غيرها زيها زي اي شركة مش هيجيلها زبون و يروح من غير ما يدفع فلوسيعني لو كان هو فحص الموبيل زي ما انت فحصته كان زمانه قالك لا يا افندم الموبيل مفيهوش عيب دا حضرتك بس دخلت الكارد غلط!!و طبعا الموظف دا لو مديره شم خبر عن الخدمة اللي عملها فيك .. هياخد جزاء مع تقطيم وانذار ان الفعل دا ميتكررش .. وان اتكرر الف واحد عايز يجي مكانك و بمرتب اقل !!دي باه الحقيقة .. طالما رحت برجليك لازم تدفع مصاريف اي حاجة .. واسهل حاجة تتقالك غير السوفت وير بتاعه ..مرة واحد دخل شركة كبيرة بالغلط و دخل قابل المدير التجاري وبعد التعارف والقهوة و شوية كلام عام .. قاله انا جاي اشتري (.. ) من عندكم و معايا 10 الاف دولار عربون .. المدير التجاري كان ادي خبر لرئيس مجلس الادارة لان الشخص اللي دخل مكتبه كان له وزن واسم رنانخرج المدير برة المكتب و راح لرئيس مجلس الادارة قاله يا افندم دا جالنا بالغلط دا يقصد شركة تانية اسمها متشابه قاله انت غبي.. انت اتجننت تسيبه يخرج بالفلوس.. واحد جايلك ومعاه فلوس ولو 10 جنية .. اتعلم ..افتح معاه موضوع مناسب لمنتجاتنا وخد منه المبلغ عربون لحسابنا. وقد تم فعلامعذرة علي الكلام الكتير بس دا حالنادخول الحمام مش زي الخروج منهيلزمها دعوة "ربنا يوقفلك ولاد الحلال"علشان تعرف تعيش

  5. موجة Says:

    >بوست رائعتشرفني زيارتك

  6. Ahmed H. Melege Says:

    >فعلا راية شركة نصابة وببساطة لو عاوز تتأكد ادخل على موقعهم على الانترنت مش هتلاقى حاجة واضحة اصلا ولا دعم ولا طريقة تواصل (العملاء) الكترونيا بالشركةجرب تتصل برقم خدمة العملاءانا اتصلت وفضلت معلق على الخط 45 دقيقة بلا رد!خدمة سيئة

  7. اقصوصه Says:

    >حلو جدا ان الانسان يكون غير سلبييعرف كيف يدافع عن حقه وما يسكت عن الظلم🙂

  8. MaRaWaN Says:

    >وهو يعنى من امتى راية كويسة؟؟بس مش هى لوحدها اللى بايظة،أى شركة كبيرة فى أى مجال"ماعدا فودافون الصراحة" صعب تحل مشاكلك معاهم بسهولةحصلتلى مشكلة أخرى بس مع بتوع كارييراقرا و قول رأيكhttp://toktokist.blogspot.com/2009/10/blog-post_23.html

  9. Hager Za3bal Says:

    >فكرتني برايه وايامها..كنت كل ما اودي الموبايل يقولولي نفس الكلام وانه محتاج سوفت وير وان كل حاجه هتضيع من عليه ..وكمان داخل الضمان لازم تدفع فلوس علي اي حاجه .. ولو اتكلمت يقولولكك اصل ده سوق استخدام .. لا لا يا فندم واحنا بنفحص موبايل حضرتك لقينا فيه مايه !!ازاااااي يعني ؟؟! دانا جايباه عشان حاجه تانيه خالص ومجبتش جمبه اي مايه !!لدرجة انهم عقدوني من الموبايلات النوكيا وبقيت اجيب سوني اريكسون .. طبعا بدون ذكر اسم الشركه اللي ماسكه توكيل موبايلي السوني اريكسون دلوقتي .. بس فعلا مقارنة برايه شركه محترمه جدا !موضوع جميل اوي يا محمد🙂

  10. *,*AMY LEE*.* Says:

    >والله مش عارهف اقول ايهبس دا بقى العادي على فكرهانا رحت مره اصلح الجهازوسوفت وير وهيصه وبتاعدي بقت حاجه مقرفه…مصر كلها كدا..فمعاملبتها فناسها

  11. magi Says:

    >من زمان معايا نوكيا بس الحمد لله حرمت اجيب اى حاجه نوكيا تانى المشكله الرئيسيه هى ان لو الموبايل باظ ليلتك هتبقى سودا بس البنت دى جدعه اوى

  12. يا مراكبي Says:

    >هو في الحقيقة الموضوع مش موضوع نوكيا بس .. الموضوع موضوع ثقافة عامة وهي إهبش وإجري .. ومش مشكلة خالص حكاية خدمة ما بعد البيع ديوالجو العام في مصر يعتبر إحتكاري إلى حد كبير .. فبالتالي الكل بيستغل النقطة دي واحنا نخبط دماغنا في الحيط

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: