>عن الإحتباس الحرارى

>

                لما كنت صغير درست فى المدرسة عن الإحتباس الحرارى … كنت طفل عفريت ومكنتش بحب الدراسة وكان كل همى إنى أحسب الوقت المتبقى من بداية الحصة الأولى لحد الفسحة , ولما تيجى الفسحة أحسب الوقت المتبقى من الفسحة لحد الخروج من المدرسة , بالتالى الكلام عن البيئه وذوبان ثلوج القطبين والإحتباس الحرارى .. الخ كان دربا من الخيال , وكان أكتر عمل عقلانى أعمله هو إنى أحط روايات “رجل المستحيل” بين صفحات كتاب العلوم والإستغراق فى القراءة فى نفس الوقت اللى المدرس بيشرحلنا فيه بمنتهى الدقة عن الإحتباس الحرارى .
ولما بقيت شاب وقريت أكتر عن الإحتباس الحرارى حسيت ان قضايا البيئة والتلوث وثقب الأوزون .. الخ هى قضايا تنشغل بيها الدول الأوروبية المترفة , وكنت شايف إن مصر لسه بتعانى علشان توصل لحلول لمشاكل توصل لها العالم من   اكتر من خمسين سنة , وإن دولة -زى مصر- لسه مش قادرة تنتج رغيف عيش نضيف أو تخلى شعبها يختار حاكمه بنفسه من خلال انتخابات ديموقراطية نزيهة .. دوله أمل كل شبابها السفر خارجها , ويستقوى رجالها بجوازات سفر دول أخرى للحصول على حقهم الطبيعى .. دوله بكل الصفات دى لسه قدامها فترة طويله جدا جدا لحد ما تتكلم عن الإحتباس الحرارى وقضايا البيئة وثقب الأوزون وذوبان جليد القطبين .
إلا إنى – ومن فترة طويلة – بدأت ألاحظ تغيرات كتيره بتحصل حواليا … فصول السنة الأربعة إندمجت وإختفت ومتبقاش منها غير صيف طويل وشتاء وقته بيقل وحدته بتزيد .. الجملة الأبدية اللى كنا بندرسها فى المدرسة إن مصر تتمتع بمناخ معتدل صيفا دفىء شتاء أصبحت من الماضى لإن حدة الشمس أصبحت أزيد فى الصيف وبرد الشتاء أصبح أقوى فى الشتاء .
الإسكندرية الحبيبة .. اصبح جوها فى الصيف لا يطاق بزيادة نسبة الرطوبة وارتفاع درجة الحرارة , وفى الشتاء أصبح الإستمتاع بالسير مساء على الكورنيش خطر بيعرض الواحد للنزلات الشعبية الحادة من فرط البروده . وكل ده بسبب الإحتباس الحرارى وذوبان جليد القطبين وتأثير البيت الزجاجى
ولأول مرة لمست تأثير الكلام اللى كنت بعتبره رفاهية على حياتى الشخصية .. وحسيت يمكن لأول مرة بأهمية الإهتمام بقضايا البيئة ومتابعتها أو على الأقل الإلمام بيها على سبيل المعلومات العامة , لإن الإنسان بغباؤه وتصرفاته الغير حكيمه بيضيع من ايده اهم حاجه بتمثل السبب فى بقاؤه على قيد الحياه
ولما عرفت أهمية الموضوع ده بدأت أدور على الإنترنت بعيدا عن كتب العلوم بتاعة الصف الثالث الاعدادى , وللاسف لقيت إن المصادر العربية مش بتقدم معلومات دقيقه عن الاحتباس الحرارى , وإن قدمت فا بتكون بشكل (مكلكع) و معقد الى درجة كبيرة , لكن عرفت وفهمت إن طول فترة الصيف وارتفاع درجة الحرارة بيؤدى لزيادة نشاط الحشرات والقوارض الناقلة للأمراض.
كمان عرفت حقيقه سياسية هى إن الولايات المتحدة رافضه توقع على أى اتفاقية بضرورة ترشيد انبعاث ثانى اكسيد الكربون من مصانعها , لان الالتزام ده هيأثر سلبا على صناعتها , وهنا الولايات المتحدة بتعمل اكتر تصرف بشرى غبى فى التاريخ بإيثار مصلحتها على حساب مليارات البشر اللى لسه متولدوش وهيتكتب عليهم يعيشوا فى بيئه افسدها اجدادهم الأمريكان . الخوف كمان ان نسبة التلوث الحالية هتخلى العجلة تدور بشكل اسرع وهنواجه مشاكل الإحتباس الحرارى فى الجيل الحالى مش الأجيال القادمة

خلاصة القول إن الاحتباس الحرارى مش قضية رفاهية نذاكرها لولادنا فى المدرسة او نقرا عنها فى مجلة علمية وإحنا عند الحلاق … الإحتباس الحرارى ممكن يأثر على حياتنا بشكل قوى … وعملى .. أنا مش هقترح حلول ولا هحط لينكات لمعلومات عن الإحتباس الحرارى .. دوروا انتو بنفسكم زى انا ما دورت علشان الموضوع مش محتاج اهمال

المقال مشاركة فى يوم بلوج أكشن داى لتجميع أكبر قدر من التدوينات حول موضوع عالمى واحد
محمد حمدى

6 Responses to “>عن الإحتباس الحرارى”

  1. محمد الوكيل Says:

    >بصراحة يا حمدي موافقك تماماً على موضوع إننا في بلد زي مصر المفروض منفكرش في مشاكل "سطحية" زي ثقب الأوزون والاحتباس الحراري والكلام ده كله.. لأن الشعب كبار وصغار لو مماتوش بسبب ثقب الأوزون والاحتباس الحراري والتلوث هيموتوا من الأغذية المسرطنة ومياه الشرب بطعم الصرف الصحي وتهور سائقي السيارات -الميكروباصات خاصة!- والنَقطة والإهمال.. إلخ..! فلما نبقا نحل كل المشاكل اللي بتسبب موتنا في الوقت الحالي نبقا نفكر في المشاكل اللي هتموتنا بعد ما نحل الأولانية..!!وشكراً يا حمدي على مجهودك في التدوين والبحث في الموضوع ده :)محمد الوكيل

  2. Mohamed Hamdy Says:

    >يا محمد انا رايى هو تماما عكس رايك .. انا رايى اننا نهتم بالقضيه لانها تستحق الاهتمام وبتاثر فى حياتنا اليوميهواضح انك مقرتش التدوينه كويسصباح الفل

  3. فتاه من الصعيد Says:

    >انا معاك انها قضيه مهمهوالعم سام القذر " هما بيقولوا عليه كده " رافض يوقعموضوع مهمتحياتي

  4. dalia Says:

    >رائع يا محمد اول مرة ادخل على مدونتك بس حقيقي شعرت باهمية الموضوع عندك انا كتبت كتير عن الاحتباس الحراري في جريدة الشروق وزت دول علمت ان شعوبهم بيهتموا جدا بهذا الموضوع اكثر مما تتخيل في وعي دلوقتي بأهمية الطاقة المتجددة وعدم تلويث البيئةتحياتي لك

  5. dr.lecter Says:

    >كارثه خطيره هتحصل بجدانا كتبت قبل كده عن الموضوع مره في احد المنتديات لان فعلا اثار الازمه دي بتبان كل يوم اكتراقربها النهارده الجو فعلا كان للا يطاق مع اننا في اكتوبروفيه مقاله لاستلاذ امريكي ان مصر من اوائل الدول الل هتتاثر بزظوبان القطب الشمالي واسكندريه غالبا هتغرقكان فيه فيلم من 5 سنين اتعرض في مصر كان مهم جدا كان بيتكلم عن نفسالموضوع

  6. محمود مخلص Says:

    >بس للاسف ان مش كل الناس بيبصوا عالموضوع من الجانب دا ان فيه ظاهرة احتباس حراري فيه كتير بيقول ان دا غضب من ربنا واننا بمجرد مانرجع لربنا كل حاجة حاترجع زي ماهي!!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: