>حصاد الدماغ

>


ملحوظة : النقاش فى موضوع  الشروق والمدونين .. علاقة الزوجة والحماة  مازال مستمرا .. فقط وضعت هذا الموضوع للتوثيق الزمنى .
فى 21 فبراير 2007 كتبت الكلمة الأولى فى السطر الأول فى مدونة “دماغى” …
البداية الحقيقية كانت قبل التاريخ ده بفترة طويله … كانت فكرة الكتابة على الإنترنت فكرة جديدة .. بدأ الشباب يلاقى فى الكتابة على الإنترنت متنفس بدل الإقتصار على الكتابة لكيانات صحفية بتستغل رغبتهم فى الكتابة وعدم وجود مصادر أخرى للنشر وتنشر أعمالهم بدون أى مقابل .. وأحيانا كانت تسطو على مقالاتهم وتنشرها بأسماء كتاب أخرين !
كنت جربت قبل 21 فبراير إنى أكتب من خلال مواقع تدوين تانية .. أيامها كان فى موقع إسمه الناشر الإلكترونى .. بيقدم خدمة إنشاء مدونات عربية … بدأ الموقع يزدهر والشباب يقبل عليه لسهولة التدوين عليه ودعمة للغه العربية فى قوائمه (جوجل مكانش دعم اللغه العربية أيامها) ..
الظاهر إن الموقع مكانش مستعد لمواجهة الطلبات المتزايده من الأعضاء .. سرعان ما وقع السيرفر الاساسى للموقع .. وضاعت معاة تدويناتى وتدوينات كل المشاركين … البعض من كتر الإحباط ساب عالم التدوين بالكامل .. البعض إتجه إلى مدونات مكتوب  بينما كرهت أنا كل مواقع التدوين العربية وخصوصا سياسة مكتوب اللى كانت بتفرض رقابة على التدوينات اللى بتعرضها . كنت دايما بقول إننا كشباب هربانين من كل أنواع الرقابة فى مجتمعاتنا .. هل يجوز نقع تحت رقابة إلكترونية من ناس منعرفهاش ومنعرفش توجهاتها ؟ الحل إذن فى التوجه لموقع لا يمارس أى نوع من أنواع الرقابة على محتواه … وكانت بلوجر أيامها لسه مفيش أنظار كتير من الناس توجهت لها …
عملت إشتراك على بلوجر .. بدأت التفكير فى الفكرة الاساسية للمدونة من أوائل يناير 2007 .. كنت بتابع معظم المدونات على بلوجر واراقب تصميماتها بحكم إنى ويب ديزاينر … كانت التصميمات والقوالب كلها متشابهه لإن جمهور بلوجر كان جمهور متميز كتابيا أما تصميميا فا كان الكل بيرضى بالمساحة المقدمه من بلوجر ويبدأ يكتب والسلام …
جربت قوالب مدونات مُقدمة من بلوجر .. ولا واحد عجبنى .. دايما كان فى شىء محتاج أضيفه عشان أضيف لمستى الشخصية .. ودايما مكنتش بقدر اضيفه . كنت مفتقد ( المهارات الاساسية) للتواصل مع تصميمات بلوجر .. وكتير كنت بفقد الأمل لكن تصميمات بنت مصرية لمدوناتها على بلوجر كانت بتدينى إحساس إن مش أنا لوحدى اللى عاوز أعمل ثوره على القوالب النمطية لبلوجر .. حاولت ابحث عن طرق التحكم فى قوالب بلوجر بالعربية والإنجليزيه لكن برضو مكنتش محقق التحكم الكامل فى المدونه زى ما فى خيالى .
وفى يوم من الأيام يأست من الوصول لهدفى .. وقفلت كل مواقع تعليم التعامل مع بلوجر … وقررت التوقف عن فكرة إطلاق مدونة من الاساس … وأقسمت إنى لو إتعلمت فى يوم من الأيام طريقة التصميم اللى فى خيالى لازم أوصلها لكل الناس بسهولة مش زى ما إتبهدلت أنا ..
ومرت الأيام وأنا على نفس قرارى … لحد ما فى مره من المرات لمعت الفكرة فى دماغى فجأه … مش فكرة محددة بقدر ما هى إٍسلوب للتعامل الكامل مع المدونة وتصميمها حتى فى أصغر جزئياتها … وبكده لقيتنى غارق فى مئات المحاولات لتطويع قالب بلوجر بكل الأشكال الممكنه … كانت رفيقة كفاحى فى الفترة دى سارة الإسكافى بتراجع كل خطواتى كمتصفحة عاديه للبلوج وتدينى رأيها فى كل جزئية بضيفها على التصميم المبدئى لمدونة “دماغى” مكنتش لسه حتى إخترت لها الإسم … ولإختيار الإسم قصه طويلة .. المهم إنى توصلت للتصميم النهائى للمدونة قبل تاريخ نشر أول موضوع بحوالى 3 ايام … كان كل شىء جاهز لإستقبال المولود الجديد ومكانش فاضل غير إختيار الإسم … وتحديد نوعية الموضوعات اللى هتكون منشورة فى المدونة …
وكانت أيامها موضة المدونات ذات الطابع الإخبارى .. كان وائل عباس ونوارة نجم ونورا يونس ومنال وعلاء عاملين شغل قوى وكان معظم الشباب بيحاول يدون على طريقتهم … أما أنا فا كنت ببص للمدونة على انها مساحه لحديث الإنسان لنفسه وعن نفسه … وإن المساحه مفتوحه للكلام فى أى موضوع دون التقيد بالطابع الاخبارى للمدونة
أما عن الإسم فا كانت البدائل قدامى كتيره جدا … وقعدت لعدة ساعات مع “ساره” أفكر فى إسم مختلف … ثم فجأه جاتنى فكرة تسمية المدونة “دماغى” .. والسبب الاساسى لاختيار الاسم ده هو إنى كنت قررت انى اعرض كل الافكار الموجوده فى دماغى عشان أشوف مدى تفاعل الناس معاها .. وهل انا مجنون زى ما معظم صحابى بيقولو ولا صاحب فكر جديد ؟ بخرف ولا بتكلم صح ؟
أما عن شعار المدونة “لكم دماغكم وليا دماغى” فا ده قصه طويله … كانت الفكره انى عاوز أقدم عنوان مغرى للقارىء يشده لدخول مدونة وليدة لسه بتحاول تشق طريقها وسط مدونات عملاقه لأسماء رنانه … ومن ناحية تانية كنت بحس أحيانا من نظرة المختلفين معايا فى الرأى إنهم بيعاملونى كإنى بنادى بإتباع دين جديد … وكان دايما بييجى على بالى الأية الكريمة “لكم دينكم ولى دين” …. ولما فكرت فى إسم دماغى وربطته بين الإختلاف فى الرأى قررت يكون شعار المدونة ” لكم دماغكم وليا دماغى” … وهو الشعار اللى لسه – لحد لحظه كتابة السطور دى – بتلقى إيميلات وتعليقات تشتم فيه وتتهمنى بالكفر والتريقه على أيات الله … الفكره كلها كانت تأثر بالقرأن مش تقليد أو تحريف – حاشا لله – لكلام ربنا
وبكده حطيت البوست الأول فى 21 فبراير2007
بدأت التدوين بقوه .. كنت بحط أكتر من موضوع فى اليوم الواحد .. وكان عندى أرشيف محترم من الموضوعات على جهازى . بدأت أنشرها واحده تلو الأخرى… وبدأت أطرق أبواب مواقع الدعايه للمدونات … كان لسه الأمور مش متطورة زى دلوقتى حيث الفيس بوك والتويتر والجايكو .. كانت كل المواقع دى أيامها مجرد أحلام فى أدمغة صناعها … وكان هدفى انى اخلق قارىء عاوز يتابع مدونتى كل يوم .. فا كانت فكرة نشر رواية بوليسية مسلسلة كل يومين أنزل جزء جديد منها .. وفى الأيام اللى مش بنزل أجزاء منها بحط مقالات من الأرشيف الصحفى بتاعى … وبكده بدأت كتابة سلسلة رواية حدث فى محطة الرمل وكان متابعى المدونة قله من اصدقائى المقربين … سارة الاسكافى … محمد التهامى .. صبرى سراج .. رنا تيسير وكانوا بيدونى دفعات قوية من التشجيع أظن إنى مش أدها . لكنها كانت الوقود اللى بيحركنى أيامها
مرت الأيام وخلصت مقالات ارشيفى الصحفى وخلصت معاها رواية حدث فى محطة الرمل وهى بالمناسبة أول قصه أكتبها على الإنترنت … وإسلوبى إتطور جدا بعدها لدرجه انى لما بقراها حاليا بحس انى كنت ساذج لكن مازلت معتز بيها لانها كانت اول سطورى الأدبية …
بانتهاء حدث فى محطة الرمل فكرت فى سلسلة جديدة تربط المتابعين بمدونتى أكتر … وافتكرت قسمى إنى أشرح للناس إزاى تصمم مدوناتها … وبكده بدأت بسلسلة جديدة هى تعليم التدوين للمبتدئين .. وحاولت من خلالها انى انقل للجميع خبرتى التصميمية بدون بخل ..
وكانت النتيجه ممتازه من حيث المتابعة والتعليقات الايجابية … لدرجه إنى بدأت أجاوب على إستفسارات المدونين عن بعض النقاط كمان ولحد النهرده بشوف مدونات كتير بتقول ان الفضل فى دخولهم عالم التدوين هى الفيديوهات اللى عملتها
وفى الفتره التالية بدأت أهتم بنوعية الموضوعات أكتر من مدى تدفقها .. خصوصا بعد ما أصبح فى قارئين دائمين للمدونه .. بدأت أكتب الموضوعات الاساسيه فى دماغى زى موضوع عن التحرش الجنسى وموضوع تانى عن اشرف مروان وفى نفس الفتره اطلقت موقع بلوجرز تايمز المهتم بأخبار المدونين وطبعا موضوعى الأشهر على الإطلاق حب – زواج – جنس – طلاق بجزأة الأول ثم الجزء الثانى
وانتهى عام 2007 ببوست أنا إنسان عن بعض المدونين اللى بيهتموا بالتصريح باختلافهم الجنسى او الدينى .. الخ بدون الاهتمام بالجوانب الأوسع والأروع من الحياه .
عام 2008 اتسم بالطابع الصحفى لموضوعاته … على سبيل المثال موضوعى عن اضراب 4 ابريل واللى نشرته روز اليوسف بشكل كله افتراء وكذب وتزييف واضطريت انشر تكذيب للخبر على مدونتى أيضا فوزى بجائزة المركز الأول من موقع عشرينات لأفضل تحقيق صحفى والذى تلاه نشر موضوعى الاول على صفحات موقعهم … وإنتهى عام 2008 بموضوع حقق نجاحا كبيرا بعنوان حبيبتى اسمها دلال
ومع بداية 2009 وبداية المجزرة الاسرائيليه على غزه ثم بداية تعرفى بالمدونين على ارض الواقع من خلال زيارات ميدانيه لزيارة المصابين الفلسطينيين او من خلال زيارات معرض الكتاب … وهكذا تدخل المدونة عامها الثالث .. ورغم كرهى للكتابة عن موضوعات المناسبات زى (عيد ميلاد – رأس سنه – .. الخ) إلا انى لقيتها فرصه كويسه انى اتكلم شويه عن ذكرياتى مع عالم التدوين ,  وأتمنى أكون موجود فى 21 فبراير 2010 علشان أتكلم عن ذكريات جديده .

16 Responses to “>حصاد الدماغ”

  1. Appy Says:

    >كل سنه وانت ومدونتك بخير وطيبين يا محمد وتبقى السه الجايه اكبر من كده كتير

  2. مهندس مصري Says:

    >انت فعلاً دماغ مختلفةو إصحابك عندهم وجهة نظر جديرة بالنظر:)بس ذكريات جميلةعقبال السنة الجاية

  3. زهرة الجنة Says:

    >كل سنة وانت ومدنتك بخيروعقبال 100سنة تدوين

  4. مش عارفة الدنيا وخداني علي فين Says:

    >محمد حمديكل سنة و انت طيب و كل سنة و مدونتك في تقدم و ازدهارانا اتعرفت عليك لما كنا في زيارة لمستشفي الهلال و فاكر لما قلتلك اني مش بعرف اكتب و عايزة أقفل المدونةو انت نصحتني و قلتلي اكتبي اللي في دماغك و ميهمكيش حدانا بدخل مدونتك علي طول بس مش بعلقو ده اول تعليق ليا و لكنت ليست اول زيارةتحياتي ليك دوماو إلي الأمام دائما

  5. كيــــــــــــارا Says:

    >دماغ دماااااااااااااغكل سنه ودماغاك عالييييييييييييييه

  6. حسام غانم Says:

    >استفسارإيه الجايكو ؟وإيه فايدته في نشر المدونة ؟أنا دخلت عليه ومفهمتش العلاقة

  7. وومن Says:

    >ياااااااااااااااه رحلة طويلة قوي انت حسستني قد ايه انا محظوظة اني دونت في 2008 الموضوع مخدش معايا أكتر من يوم سيرش علي النت وكمان حكاية اللقاء الفعلي بالمدونين دي انا روحت اول تجمع تدويني بعد ما ابتديت بشهر فعلا دماااااااااااغ كل سنة ودماغك بخير ودايما معاك

  8. عاقلة علي ارض الجنون Says:

    >تسلم دماغك يا محمد بجد انت من الصحفيين القلائل اللي بحترمهمو بالرغم من إن كتير بختلف مع دماغك و بنقعد نتخانق بس بجد بيعجبني إنك بتحترم الاختلاف :)أتمني نفضل أصدقاء :]

  9. dr.lecter Says:

    >انا فاكر فعلا التاريخ ده يومها كنت علي الماسنجر وبعتت لي اللينك بتاعك ودخلت ويمكن تكون مدونتك اول مدونه ادخلها وابتدي اهتم بعدها بعالم التدوين رغم اني لسه ماكملتش سنه بس مدونتك فعلا يامحمد جميله يمكن اختلف معاك في بعض الاراء لكنها تستحق الاحترام بجد

  10. GHARAM Says:

    >هذا البوست بمثابة تأريخ لبداية دخولك عالم التدوين كل سنه وانت طيب وبكره إن شاء الله تكون من أهم الأدباء والصحفيين في مصر

  11. Desert cat Says:

    >كل سنة ودماغك فى تقدم دائم ومستمر

  12. كلاكيت تانى وتانى Says:

    >ارجو نشر الايفنت لديك على مدونتك او جروبك والدعوة لحضور الحفل بين كل المدونين واصجقائكم على الفيس بوك وذلك لتأييد المدونات المشاركات فالحدث ويشرفنا حضوركصورة الغلاف على مدونتى حفل توقيع العدد الثالث من سلسلة مدونات مصرية للجيبكتاب “أنا انثى ” ..لمجموعة من المدونات النساءأول كتاب يناقش اهتمامات المرأة بقلم مجموعة من النساء ويطرح القضايا للنقاشضيفة شرف الحفل ..(غادة عبد العال ) صاحبة مدونة ..عاوزة أتجوز..والتي صدر لها كتاب بنفس العنوان عن دار الشروقومن المشاركات في كتاب ..أنا أنثىنوارة نجماسر ياسرايناس لطفىنرمين البحطيطىشمس الديند . رشا عبد الرازقبيلا شريفمكسوفةبسمة عبد الباسطمريم الغنيمىإيمان نادىزهراء امير بسامآية الفقىمروة السيدأميرة محمد محمد محمدفاتيمامذكرات عانسنرمين البحطيطىسلمى أنورانجى سمراء النيلسارة ابراهيم علىسمر مجدىمروة النجارشيماء حسننسرين عبد النعيمد.مرام محمودايناس لطفىنجلاء الشربينىمحاسنيصاحب الحفل عرض فيلم قصير و==================================المكانالمركز الثقافى الدولى17 ش السد العالى ميدان فينى الدقىالشارع المقابل لشيراتون الجزيرةاقرب محطة مترو انفاق محطة الاوبراالزمان يوم 3 مارس الساعه 4.30 عصرا

  13. *البت المشمشية *حلوة بس شقية * Says:

    >ربنا يوفقك يا محمد من نجاح لنجاحوربنا يديك اكتر من كدة كمان

  14. اقصوصه Says:

    >رغم ان التدوينهوااااااااااااايدطوووووووووووووويلهالا اني استمتعت بقرائتهامن الالف الى الياءفعلا..رحلة كفاحانا بعد مب راضيه عن القوالب الموجودهاتمنى اصمم قالب خاص ليبس للاسف ما عندي اي خلفيهعن هالموضوع:(عالم التدوين عالم جدا كبيرحلو ان يكون لك متابعينواصدقاء يشجعونكناس تسال عنكوتتناقش معاكتقدر تطرح جدامها كل ما يجول في خاطركتمنياتي بمزيد من الازدهار لمدونتك🙂

  15. مخبر قمل دولة Says:

    >على فكرة انا باعتبرك افضل مدون من حيث الاسلوبوبجد نفسي ابقى صاحب اسلوب متميز وافكار متنوعة زيكباصبر نفسي بفرق السن واقول ان في املانت متميز في مجالات كتيريعني قصصك ورواياتك ومواضيعك الساخرة وتحليلاتك اللي بتستخدم فيها منطق جميل ووجهة نظر يخلي الواحد لازم يحترم صاحبهااي نعم انا ما بتعجبنيش اراء كتير ليك بس الحمد لله كلها من اللي لا تفسد للود قضيةوانا عارف اني مش حاجة كبيرة عشان اتنبأ بمستقبل حدبس متأكد ان شاء الله – واعتقد انه رأي متفق عليه كل قرائك – انك هتعدي في يوم من الايامهتعدي مينماتعدش بقاساعات بحس جدا انك هتعدي علاء الاسواني نفسه – باعتباره – افضل روائي مصري من وجهة نظري حتى الانواخيرا سلامي وتحياتي لحضرت

  16. mahasen saber Says:

    >دايما مبدع يا دماغ كل سنه وانتا ومدونتك بكامل الابداع يا محمدويا رب فى يوم الاقيك وصلت للمكانه اليى دماغك تستحقها

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: