زيارتى مع المدونين لمستشفى الهلال

 * إضغط على أى صورة معروضة فى المدونة لتكبيرها
* الموضوع منشور ومترجم للانجليزية على الرابط التالى (شكرا لرزان على ترجمتها الاحترافيه)

النهرده كنت مع أحسن شباب مصر !!

هى دى الحقيقة الى كونتها بعد زيارتى النهرده لمستشفى الهلال الأحمر فى رمسيس القاهرة , للتضامن والتبرع لأهل غزة اللى بيتعالجوا هناك … اليوم كان رائع .. وصلت القاهره قبل المعاد بساعه .. قابلت (سعاد) صديقتى العزيزة , واللى كانت عاوزة تتبرع بدمها .. بعد شويه كلمت (إيناس) … بجد مدونة رائعه وبتنبض بحيوية ونشاط ملهاش حدود .. وهى اللى فكرت ونظمت للفكرة الرائعه دى … كلمتها وعرفت منها مكان التجمع بالظبط وروحت هناك … لقيتها هى و (بنت خيخة واى كلام) وعدد من المدونين … اد ايه اخلاقهم عاليه وثقافتهم ممتازه .. والأهم من كل ده حبهم للخير وأستعدادهم الحقيقى لعمل أى حاجه فى سبيل ان اليوم ده يكون ناجح , والأروع إن اللى بيجمعنا كلنا هو التدوين وحبنا لعمل الخير … مش مهم اخوان ولا حزب وطنى ولا ناصرى ولا ملكش حزب … مش مهم تكونى محجبه او لابسه نقاب او مش محجبه خالص … مش مهم تكون مسلم ولا مسيحى … المهم انك عاوز تعمل الخير وبس ..

مع مرور الوقت بدأ عدد المدونين يزيد ويزيد … انا للأسف مش فاكر أسم كل اللى حضروا .. لكن أذكر مثلا داليا قوس قزح … أد إيه إنسانه رائعه وصديقه للكل وبتساعد وبتهتم بكل حاجه .. وطبعا مقدرش انسى وجود احمد الصباغ خال المدونين .. انسان بسيط وضحوك وشخصيته حلوه جدا .. وكان فيه (الكابل) الرائع اصحاب مدونة (ِشفقه واحسان) … مدون ومدونه متجوزين .. قمه فى الادب والاخلاق والتعامل الراقى مع كل الناس اللى حواليهم …. طبعا كان فى مدونين كتير تانيين لكن بصراحه مقدرتش احفظ كل الاسماء … هذكرها فى نهاية البوست نقلا عن مدونة داليا (قوس قزح).. المهم إنكلهم كان بيجمعهم التعاون الشديد .. بجد الشباب دول النهرده  كانوا بيتخانقو على خدمة المصابين الفلسطينيين … فى الصغيره والكبيره .. لدرجة اننا كنا بنخطف شنط العصير والتبرعات من بعض عشان كلنا عاوزين نشارك بأى مجهود حتى لو بسيط ..

اتجهنا للمستشفى وزرنا المصابين فى الغرف .. الغرف نضيفه والخدمه كويسه اوى ووجبات الأكل شكلها نضيفه ومغذية … للاسف المصابين بجد حالتهم صعبه .. انا شتمت – فى سرى طبعا – الاسرائليين بكل الشتايم القذرة الى اتعلمتها فى سن المراهقه من اصدقاء السوء … انا مشوفتش عمرى بهدله كده فى ناس مدنيين .. والله صور المصابين الروس فى الحرب العالمية التانية نتيجة القصف الالمانى كانت ارحم من الى انا شوفته النهرده رغم ان المصابين الروس كانوا عسكريين مش مدنيين …

كمان لاحظت من كلامى مع المصابين أن ملهمش اى انتماء سياسى … لا حماس ولا فتح ولا الجهاد ولا العفريت الازرق .. كلهم ناس عاوزه تعيش فى سلام وتشتغل وتكسب رزقها وتربى عيالها زى اى حد .. لاقو فجاه الصواريخ فوق دماغهم بدون اى مبرر .

مقطعش قلبى اكتر من مشهدين … الاول لشاب فلسطينى .. فى نفس سنى وسنك .. رجلة اتقطعت بسبب اصابه مباشره من صاروخ اسرائيلى .. والمشهد التانى لاب فقد ابنه من فتره قصيرة جدا .. يعنى تقريبا ابنه اتوفى قبل احنا منطلع المستشفى مباشرة .. اد ايه كان صابر ومحتسب ابنه اللى عنده 15 سنه شهيد عند الله – عرفت بعد كده ان ابنه اسمه نادر قدورة – .. ولما سالته ناوى يعمل ايه رد بدون تفكير : راجع غزه… هترجع تحت القصف ؟ اه  .. هترجع رغم الموت ؟ اه …. هرجع يعنى هرجع …

هسيبكم مع الصور ومع تحديثات لنتائج الزيارة وأسماء الحاضرين … الخ

المدونين متجمعين خارج المستشفى
 
وهنا داخل المستشفى
 
أحمد الصباغ كان مهتم بالمتابعه والتصوير والمساعده
 
سعاد مع أحد المدونين .. للأسف مع كترة العدد نسيت أسمه مع أنه شخصيه فى غاية الروعه


أصابه صاروخ أسرائيلى

من أكتر المشاهد المؤلمه .. مصاب فقد ساقه
أصابته شظية صاروخ فى أنفه



قائمة المدونين المشاركين :
محمد حمدى ( مدونة دماغى)
نهر الحب
خيخة و اى كلام
احمد الصباغ
ضياء بيوتيفول مايند
خالد همس الاحباب
كيكى
مونى مذاكرت زوجة شابة
وومن امراة بعقل رجل
شريف
شوية كلام
مها زين انها الحياة
محمود الدوح
هى فوضى
بنوتة مصرية
ربة السيف و القلم
وحدى لكن ونسان
زهرة الجنة
مصرية متغاظة اند مفروسة
شفقة واحسان
دعاء مواجهات
شمس الليل
الازهرى
عرفة الاسيوطى
ايمان ..سوبيا
Advertisements

33 Responses to “زيارتى مع المدونين لمستشفى الهلال”

  1. ~*§¦§ Appy §¦§*~ Says:

    انت اول مره تحضر تجمع فى يا محمد شوفت الاحساس ابلخير والتجمع والاحترام بيكون حلو ازاي ربنا يشفى المرضى الصور وجعت قلبى
    انا ان شاء الله هروح بتاعت فلسطين اللى فى مصر الجديده ان شاء الله
    على فكره كمان فيه بوست عند نواره فيه صور لليهود هي عاوزه ننشره فى المدونه التانيه يا ريت تنشره هتلاقيه بعد بوست هيكل
    روح حطه فى المدونه الجديده
    وسعيده انك بدات تشترك فى الحاجات دي يا محمد مرحبا بك فى العالم الواقعي للمدونين

  2. عاشقة القمر Says:

    ربنا يجعل في ميزان حسناتكم
    دايما يجمعكم علي عمل الخير

  3. Marwa Rakha Says:

    Mohamed, I linked to your post on GVO

    http://globalvoicesonline.org/2009/01/08/recap-egyptian-bloggers-visit/

  4. ~*§¦§ Appy §¦§*~ Says:

    محمد انا عارفه انك قابلت مدونين بس اللى اقصده فى عمل خير زي كده
    وانا سعيده بيك وبتفكيرك

  5. مهندس مصري Says:

    فعلاً اللقاءات دي بتكون جميلة قوي و بتكون مليانة حب للخير

    و اظن رد الراجل الفلسطيني اللي قالك انه راجع غزة مهما يكون هو احسن رد على اللي بيقولوا نقفل المعبر علشان ما يجوش يقعدوا عندنا في سيناء

    الناس دي متمسكة بأرضها بأكبر قدر ممكن اي حد يتخيله

    بل و اكتر من تخيل اي حد

    ربنا ينصرهم و يكرمهم بحريتهم

  6. واحدة مفروسة Says:

    السلام عليكم و رحمة الله و بركاته
    ربنا يجازيكم كل الخير على اللى بتعملوه
    بس انت مش معايا انك من غير زعل بس
    كان لازم تاخد موافقة البنات انك تنزل صورهم؟؟؟
    مش تزعل منى بليز
    بس يمكن واحدة مش عاوزة صورتها تطلع مثلا؟؟؟؟
    انا آسفة على تدخلى

  7. GiGi Says:

    ربنا يكرمك ويكرمكم جميعا
    وادعولى من قلبكم بجد اعرف اروح
    هموت هيجصلى حاجه نفسي اروح ازورهم بس فى ظروف بتمنعنى
    ادعولى بجد وماتعرفوش اد ايه كان نفسي اكون معاكم
    ربنا يعزكم وينصر الاسلام والمسلمين يااااااارب

  8. Diyaa' Says:

    ربنا يجازيك كل خير ومتجمعين دايماً في الخير بإذن الله وعجبني وصفك للموقف
    في سؤال
    هو صديقتك سعاد اسم مدونتها إيه لأني نسيته 😦
    نسيت ناس كتير كمان
    عايزين نعرفهم عشان بإذن الله أقرب فرصة نقدر نكرر فيها أي دعوة خير ..نعرف نوصل لعدد كبير بيحتاج بس زقة التشجيع
    واللي عملوه الناس أقل من الواجب..متنساش الدعاء .أبقي من الشتيمة بكتير ..ومبسوط بمعرفتك يا محمد

    ربنا يبارك فيك وفي كل الناس اللي جواها حب الخير ده

  9. Diyaa' Says:

    ربنا يجازيك كل خير ومتجمعين دايماً في الخير بإذن الله وعجبني وصفك للموقف
    في سؤال
    هو صديقتك سعاد اسم مدونتها إيه لأني نسيته 😦
    نسيت ناس كتير كمان
    عايزين نعرفهم عشان بإذن الله أقرب فرصة نقدر نكرر فيها أي دعوة خير ..نعرف نوصل لعدد كبير بيحتاج بس زقة التشجيع
    واللي عملوه الناس أقل من الواجب..متنساش الدعاء .أبقي من الشتيمة بكتير ..ومبسوط بمعرفتك يا محمد

    ربنا يبارك فيك وفي كل الناس اللي جواها حب الخير ده

  10. koukawy Says:

    ربنا يكرمكوا و يساعدكوا علي فعل الخير دايما
    انا لسه امبارح باعته حاجات علي المعبر مع ناس بتسافر كل جمعه و سبت
    شباب متطوعين برضو

  11. mohamed Says:

    أنا محمد
    تشرفت بمعرفتك
    ومعرفة المدونه حاجات جوايا
    وكل الاخرين
    زيارة الجرحى
    ورؤيتكم
    تبعث فى أملا فى المستقبل
    مدونة شويه كلام اللنك
    http://kalamfekalamm-mohamed.blogspot.com/

    اما مدونتى الاخره مشاعر و أفكار
    http://kalamfekalamm.blogspot.com/
    تشرفت بيكم

  12. نهر الحب Says:

    يا محمد ربنا يبارك فيك
    انا سعدت بالتعرف عليك
    لكن يا محمد انا قلت بلاش صورتى
    ؟
    عموما مغفور لك منى عشان انت عملت خير
    احذفها بقى
    بجد جزاك الله خيرا
    وعلى فكرة انا مش عملت شئ العمل دا جماعى يا محمد ولله فقط
    ولاجل (0000)ربنا يبارك فيك

  13. شفقة هانم واحسان بك Says:

    جزاك الله كل خير
    بجد اليوم كان رائع
    واحنا سعدنا جدا جدا بمعرفتك
    ويارب نتجمع فى الخير دايما
    ميرسى كتير على العصير يا محمد
    ههههههههههه
    على فكرة انا وزعته مشربتوش برغم انى كنت طمعانة فيه
    بس يلا
    المرة اللى جاية
    تحياتى

  14. Sharm Says:

    ربنا معاهم

  15. همس الاحباب Says:

    سعيد بمعرفتك
    وربنا يجازيك خيرا
    ودائما نلتقى على خير
    بس رجاء بلاش نشر صور البنات
    ممكن الشباب بس البنات بلاش
    احنا اتعودنا على كده فى تجمعاتنا
    تحياتى

  16. دعاء مواجهات Says:

    ربنا يتقبل مننا يارب

    ويجعلنا منو نصيب

    اتشرفت بمعرفتك

    بس هو انت صحفى فين ولا هواية بس؟؟

  17. نهر الحب Says:

    شكرا يا محمد ربنا يبارك فيك
    بس الناس شافتنى يا محمد :(( خلاص
    بجد شكرا وانت من الشخصيات اللى انا فرحانة بيهم بجد
    جزاك الله خيرا
    وسلامى لسعاد الجميلة اللى كانت عايزة تتبرع بالدم ربنا يحفظها يارب
    شكرا لك

  18. mony Says:

    الحمد لله اليوم كان فعلا جميل جدا

    و فيه روح حلوة

    ربنا يجعله في ميزان حسناتنا

  19. doaa Says:

    بجد ربنا يكرمكم ويكتر من أمثالكم ويجزيكم خير على الخطوة ده
    للأسف أنا شفت الموضوع متأخر
    وإن شاء الله هحاول أروح مع أصحابي أو مع جمعية رسالة
    ياريت لو هتتجمعوا تاني تقولولي عشان أتعرف عليكم وعشان نشجع بعض على الخير

  20. أحــوال الهـوي Says:

    احساس رائع في وقت صعب

    ان تري من احببت من وراء كلماتهم شخوص بذاتها و تحاول ان تطابق التخيل بالواقع
    قد تري انسانة لرقيقة متواضعة تكتب طلقات رصاص او شخص تغلب علي ملامحه الجديه و هو مفعم بالرومانسية
    و الوقت الصعب زيارة الجرحي و كلك الم و تخرج من عندهم وقد رايت الامل و القوة في وجوههم

    يابختكم
    تحياتي

  21. همس Says:

    ياربنا هو انت

    اللى ادتنى مقاله فى فوبيا الاسنسرات

    ههههههه

    الحمد لله الجبس فك وجيت اهو

    على العموم شرفتنا بوجودك

    ويارب ديما نشوفك على خير

  22. زهرة الجنة Says:

    الحمدلله زيارتنا للمستشفي اسعدت ناس كتير بالرغم من الآلمهم الا انهم فرحوا جدا بزيارة المدونين

    ربنا يجعله في ميزان حسناتك
    ويبارك في كل من شارك في هذا اليوم
    وان شاء الله دايما نتجمع في الخير

  23. دنـيـا محيراني(ايناس لطفي Says:

    كان نفسي اكون معكوا معلشي
    بس بجد مجموعه رائعة واحساس عالي من المدونين واكيد كانت لحظات صعبة
    ربنا يجعل اللي عاملتوه ده في ميزان حسناتكوا
    —————-
    قرئيت دلال يا محمد مش عارفه اعلق اقول ايه غير اني بكيت بصوت مسموع
    تسليم ايديك واحساسك
    تحياتي

  24. tohamy Says:

    ربنا يكرمك يا محمد و تعمل خير كتير
    اخوك محمد التهامي

  25. البت المشمشية حلوة بس شقية Says:

    ربنا يكرمك يامحمد ويقدرك على عمل الخير يارب
    انتا عارف انا كان نفسى ابقا معاكو
    بس انتا عارف الامتحانات بقه
    هنعمل ايه
    وسلملى على مامتك

  26. mahasen saber Says:

    ربنا يتقبل يا محمد يا رب

    ويا رب ربنا يخفف الالمهم ويفك كربهم ان شاء الله

  27. د. إيمان مكاوي ( أم البنين ) Says:

    السلام عليكم
    جزاكم الله خيرا على ما تقومون به
    أنا وضعت لينك مدونتك عندي كنموذج لمدون عايز يعمل حاجه ..مشاركة مني لكم ..ومحاولة لنشر ما تفعلوه
    ياريت لو تعرف مدونات أخرى تخبرني بها
    تحياتي

  28. نهر الحب Says:

    اللقاء يوم الجمعه 16/1
    عدد الجرحى فى الاسماعيلية 19 حالة
    بعد ان توفيت شابه هذا الصباح
    منهم سيدة تبلغ من العمر 58 عام
    وشابة فى العناية المركزة عندها 17 سنة
    والباقى رجال من سن 17 عام الى الاربيعنيات
    ومازالت المستشفى تستقبل المزيد
    محتاجين تبرعات مالية
    وبعض الملابس
    رقم تلفونى هو 0188047779

  29. م/ الحسيني لزومي Says:

    حمله المقاطعه
    لا تستطيع ان تجاهد
    لاتستطيع ان تتظاهر
    لا تستطيع ان تتبرع بالمال
    اذن قاطع وادعو غيرك للمقاطعه
    منتجات كل من يدعم العدو
    **** هل تعلم أن:-
    1- شركه ستار بوكس(للكافيهات والقهوة) تدعم العدو ب 2 مليار سنويا من ارباحها
    2- شركة فليب موريس (مارلبورو & مريت ) تدعم العدو وتدفع بصفة يومية ما مقدارة 12% من ارباحها.وعليه فإن مدخني العالم الإسلامي فقط يدفعون كل صباح 12 مليون دولار اي ما قيمته طائرة اف-16 كل اربعة ايام .

    *** قائمة المقاطعة
    ستار بوكس
    ماكدونالدز
    برجر كينج
    كنتاكي
    بيترا كينج
    كوكاكولا
    بيبسي
    فردركرز
    شيليز

    لنوقف شراء البضائع الأمريكية والبريطانية لشهر واحد فقط

    سوف تكون تكلفة هذا الشهر عليهم خسائر مقدارها
    37 بليون دولا

  30. ستيته حسب الله الحمش Says:

    اخي العزيز تحياتي
    هناك شكوى من ان موقع الآن في غزة ثقيل في التحميل وانا فعلا شايفة كده كمان بشكل شخصي

    هل ممكن نشوف حل للموضوع ده؟
    طمني على احوالك واتمنى دائما لدماغك كل خير

  31. اقصوصه Says:

    ما شالله عليكم

    فعلا اللي سويتوه شي جدا جميل

    الله يجيازيكم عليه كل خير

    ويجعله فميزان حسناتكم يا رب

    والله يفرج عن اخواننا في غزه

    اميين يا رب

  32. Hannoda Says:

    ربنا يهون عليهم الالم وينصرهم

    كان نفسي اكون معاكم ويارب تتتكرر اثناء اجازتي انشاء الله

  33. Zika Says:

    البوست ده والصور دي بتفكرني بفيلم الطريق الي ايلات
    ياريتني كنت معاهم
    ياريتني كنت معاهم
    بس تقول ايه بقي امتحانات بعيد عنك وعن السامعين يارب

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: