>لنعلن الحرب الإعلامية !

>

تعالو نتفق … إسرائيل متفوقة على العرب ماديا وتكنولوجيا وعسكريا … وتعالو نتفق إن أى حرب من أيام الحرب العالمية التانية وحتى اليوم بتعتمد إعتماد كبير جدا على الدعاية والحرب النفسية …

لو اتفقت معايا على النقطتين اللى فوق دول يبقا لازم اقولك على حقيقة بتقول ان العالم النهرده بيشهد ثورة فى وسائل الاعلام , من خلال انتشار قنوات فضائية وحاجات تانية اسمها (الاعلام البديل) يعنى الاعلام الى يقدر الناس العادية الى مش بيشتغلوا فى الصحافه او بيملكوا قنوات اذاعية او تليفزيونية انهم يعملوه .. زى الاعلام من خلال الفيس بوك والمدونات والجايكو والتويتر واليوتيوب … الخ كل دى اصبحت وسائل اعلام مهمه متقلش اهمية – ان كانت تزيد – عن وسائل الاعلام التقليدية .

لو صدقت كلامى اللى فوق يبقا لازم تصدق ان الشباب اليهودى المنتمى لقضيته وبيدافع عن بلده وحقها فى الحياه من خلال ابادة شعب كامل بحجة انهم بيضربوا عليهم صواريخ يادوب بتهز النجفة بتاعة البيت عندهم .. الشباب دول عارفين يستغلوا امكانيات اعلامهم البديل من يوتيوب وتويتر وفيس بوك … الخ اقصى استغلال فى صالح قضيتهم … يمكن لان عددههم قليل فا عارفين قيمة التجمع كويس .. يمكن لان دى موهبه فى الانسان اليهودى بشكل عام انه بيعرف يلفت انتباه العالم كله لقضيته .. يمكن لانه مستغلش اليوتيوب فى نشر فيديوهات من عينة (بحرينية جامدة موت فى حضن سعودى تخين) .. يمكن لانه مستغلش الفيس بوك فى التظبيط وعمل جروبات تبادل الزوجات … يمكن لانه مستغلش الجايكو والتويتر فى التلسين على اعراض البنات المحترمه … تعددت الاسباب والنتيجه واحده .

يبقا لو انت مقتنع بكل كلامى يبقا انت دلوقتى مقتنع ان اسرائيل متفوقه علينا فى كل عناصر الحرب دى الا فى عنصر واحد هو عنصر الاعلام .. لان احنا بنملك نفس الادوات اللى الشاب اليهودى بيملكها .. بالتالى اذا كنا رضينا بالتفوق الاسرائيلى الحتمى علينا فى كل المجالات مينفعش نوافق على التفوق الاعلامى علينا لاننا على الاقل متساويين فى النقطه دى .

فى الفتره الاخيرة شويه ولاد وبنات من اجدع بنات وشباب الانترنت .. كان ليا شرف معرفة كتير منهم بشكل شخصى واللى معرفوش منهم شخصيا اعرفه من خلال لقائنا الفكرى فى عالم التدوين … الولاد والبنات دول دعوا كل الى يعرفوه انهم يوصلوا صوتهم للعالم الغربى الحر .. وللعالم العربى الجاهل الى مش عارف حقيقة الى بيحصل على ارض غزه وواهم نفسه بقضايا فرعية زى الخلاف على احقية حماس او فتح بالسلطة …

انا فكرت لقيت ان لو كل شخص اشتغل فى اتجاه لوحده الجهود هتتشتت , ومحدش هيستفيد بتجربة الاخرين , ناهيك اننا مش هنعرف نوصل صوتنا للعالم الغربى كناس متحضرة بتقدم محتوى ممكن الوثوق فيه . مش مجرد شتايم او خناقات او مناقشات حامية فى قاعات الشات .

بناء على كل ما سبق انا عملت موقع Now in Gaza هتلاقوه على الرابط ده http://nowingaza.blogspot.com باللغة العربية والانجليزية بالاضافة لقسم المالتى ميديا … القسم العربى بيقدم محتوى اخبار للقارىء العربى عشان يعرف الاخبار الحقيقيه لحظه بلحظه , القسم الانجليزى بيقدم أخبار للقارىء الانجليزى لحظة بلحظة برضو عشان يكتشف الفرق بينها وبين البروباجندا الاسرائيلية .. مثلا على سبيل المثال اكتشفت من مجرد مطالعه بسيطه للمواقع مدى الاختلاف الرهيب بين الاخبار اللى بيكتبها موقع بى بى سى العربى وموقع السى ان ان الانجليزى .. والاختلافات كتير .. اما قسم المالتى ميديا فا هنحط فيه ملفات الفيديو واليوتيوب والصور الخاصة باللى بيحصل فى غزه

الحاجة الوحيدة الى بتواجهنى كمشكلة فى الموقع , واللى بدعوكم انكم تساعدونى فى حلها هى انى مش هقدر اواكب على كم الاخبار المتدفق لحظه بلحظه , خصوصا بالنسبه لموقع بالعربى والانجليزى , ناهيك عن ضرورة وضع كل الصور وملفات الفيديو .. يعنى باختصار مجهود مستحيل يقوم بيه شخص واحد .. من هنا جاتلى الفكرة الى عاوزكم تساعدونى فيها …

كل واحد عنده استعداد يتابع او ينقل او يبعت او يترجم او يجمع الاخبار عن غزه يبعتلى ايميل يطلب فيه دعوه للكتابه فى الموقع , وانا هعمله Invie بحيث يكون عضو مشارك فى المدونه , ولما يقبل الدعوه هيلاقى المدونه ظهرت فى لستة المدونات بتاعته زى متكون مدونه مملوكه له .. كمان هديله ملف وورد صغير يشرح بالتفصيل ازاى يحط الاخبار بشكل صحيح فى اقسامها الصحيحه .. وبتمنى ان بنهاية فتره قصيرة نكون جمعنا عدد ضخم من البلوجرز العرب والاجانب من العالم الحر المسلمين والمسيحيين المحترمين الى عاوزين يقدموا اعلام بديل حقيقى يطغى على الاعلام الاسرائيلى المشوه والمغلوط .. ومع تدفق الاخبار وزيادة المشاركين يستمر موقعنا فى تقديم الاخبار لحظه بلحظه بالمعنى الحرفى للكلمه .

أنا كلى عشم فى ناس معينة .. مش هتكسف وهقول اسماءهم علنا .. انا كلى امل فى نوارة نجم (جبهة التهييس الشعبية) … فى زينب (بنت مصرية) .. فى رحاب (كوكب أبى) … فى احمد شقير (حكاوى اخر الليل) و أحمد الصباغ وغيرهم كتير جدا انهم يشاركونى الحرب الاعلامية بتاعتنا

مش مطلوب تكون صحفى او خبير اعلامى او سوبر مان … مطلوب بس انك تنتمى ولو لمرة واحده لقضية كبيره وتبعت ولو خبر واحد كل يوم .. هيفرق كتير .

وياريت محدش ييجى يقولى انه مش مقتنع بالقضية او انه مع فتح ضد حماس او حماس ضد فتح .. او حدود مصر وامنها القومى … الخ .. لان انا شخصيا ضد فتح وضد حماس .. ومع مصر .. لكن كل ده لا ينفى ان انتمائى الوحيد للناس المدنين اللى بيموتو كل شويه منغير اى ذنب .. انتمائى لبنت ماتت كان ممكن تكون حبيبتى .. وطفل مات كان ممكن يكون ابنى .. وست ماتت كانت ممكن تكون امى …


أما لو كسلت تعمل اى حاجه من دى .. ياريت على الاقل تخصص بوست من مدونتك تتكلم فيه عن موعنا وتحط فيه اللينك بتاعنا يمكن حد يدخل لنا من عندك وتبقا اضفت لنا برضو .. ابعت جايكوهايه او بوست تويتر .. دخل صحابك على جروب الفيس بوك الخاص بالموقع .. اكيد هتقدر تشارك معانا ولو بأقل القليل

باختصار : مش مطلوب منك اكتر من انك لو لقيت خبر جديد على جايكو او فيس بوك او على الريدر بتاعك يخص غزه بالعربى او الانجليزى (وطبعا الاهتمام الاكبر بالاخبار الانجليزيه) او من خلال صورة او ملف فيديو انك تحطها فى موقعنا … هدفى فى النهايه اننا نعمل موقع بيقوم على الكتابه فيه عدد ضخم من الافراد بشكل يعمل تحدث شبه لحظى للموقع يخلينا نحتل قمة صفحات البحث على جوجل وياهو ونحارب سياسة التعمية الى بيمارسها الشباب الاسرائيلى

لو عاوز تعرف اكتر ازاى ممكن تساعدنا دوس هنا .

لو عاوز تشاركنا ابعت رساله على nowingaza@hotmail.com تطلب فيها الاشتراك فى المدونه .. وابدا فى ارسال الاخبار بمجرد ما تجيلك الدعوه وتقبلها .

تحياتى للجميع .

21 Responses to “>لنعلن الحرب الإعلامية !”

  1. مواطن مصري Says:

    >فكرة في الجول يا معلم و ندعم الفكرة

  2. GiGi Says:

    >معاك يادماغنفسي ابقى معاكم بس مش عارفه هقدر ابقى اد ده ولا لالكن انا او اطول دمى كله وكل حاجه جوايا اديها لفلسطين والله مستعده

  3. جبهة التهييس الشعبية Says:

    >انا معاك يا محمدوكتبت عن الموضوع في المدونة

  4. Bella Says:

    >انا بعت لك يامحمد ميلعايزة اشارك معاكم

  5. بنيامين الدوسي Says:

    >اخ \ محمد اشد على يداك وانا معكم benjamin_aldosi@windowslive.comلنكن يدا واحده ومدونتي معكم http://benjamin999.blogspot.com/لنغذي الموقع بالصورلنغذيه بالمقالات المترجمهلنتستقطب مدونين بارزين وايضا كتاب بارزين بالساحهوبعض المقاطع من اليو تيوبولننشره على الشبكه العنكبوتيه فكره رائعه تحتاج الى التكاتف والتعاون اخوك\ بنيامين الدوسي

  6. دعاء Says:

    >أنا كنت ناوية مع مجموعة شباب من أصدقائي نطلق موقع بالفعل ولكن توحيد الجهود أفضل بتأكيدبعتلك أميل

  7. قوس قزح Says:

    >انا كمان معاك و بعت الايميل ربنا يوفقنا لعمل شىء يساعد و لو بسيط

  8. ~*§¦§ Appy §¦§*~ Says:

    >بص يا محمد دلوقتى ممكن يبقى فيه حاجه احسن علشان ميكونش فيه لخبطه الناس تدخل وتسيب الاخبار ومصادرها واللى يبقوا قايمن على المدونه دى اتنين تلاته وفيه تنسيق بينهم فاهم ودول ينشروا بالتناوب انا عملت لينك عندى بالموضوع عموما شوف راى ورد عليا فيه

  9. GiGi Says:

    >انا حطيتلك اللينكات لانى فعلا نسيت حطيت اللينكات التانيه ونسيت دى انا اسفه طبعاتحياتى

  10. أحمد حشمت Says:

    >الفكرة في غاية الروعة لك كل الاحترام والتقديرلكن أعتقد ان هيحصل لخبطةلأن كل واحد هيشاركهيحط بوست ليه أو فيديوأو ما يراه مناسباووارد جدا يحصل تكرار ولخبطةلكن أنا معاكممكن تقبلني

  11. إنعكاس Says:

    >جميل جدا ..مجهود طيب .. بس يارب يكون ليه نتيجة بإذن اللهلأني من الناس اللي بتقلق من الكلام فقطبس زي ما قلت الاعلام هو الحل الوحيد المتوفر حاليا :)جومانا

  12. آلام وآمال Says:

    >محمد التعليق ف المدونة الجديدة متعب جدااياريت تلغي الرمز التأكيديوكمان انا معلق على الموضوع ده هنا وكنت بعد بيلاراح فين:P

  13. Ahmed Shokeir Says:

    >محمد فكرة جيدة بلاشك .. وإن كنت لسه شايفها حالا بعد نزول مجموعة من التدوينات ولاحظت الآتيعدد التدوينات بالإنجليزية قليلة جدا .. وطبعا التدوين بالانجليزية بيفرق كتير في كتابات من النوع ده عشان الصوت يوصل للأخرينثانيا : بعض التدوينات طويلة مما يدفع القارئ إلى عدم اكمال التدوينة .. فيرجي كتاية التدوينات القصيرة والمركزةثالثا : المدونة لا تحدد من كتب التدوينة .. احيانا ذكر من كتب التدوينة يكون من الاهمية في التدوينة بقدر محتواهارابعا : ارجو للفكرة النجاح وليعرف المدون والكاتب الغرض الاساسي منها حتى لاتتوه الفكرةخامسا : ارجو ارسال دعوة للإشتراك تحياتي

  14. البت المشمشية حلوة بس شقية Says:

    >محمد الفكرة عجبتنى وخلاص ان افكرت فيهاوان شاء الله هحاول اعملها

  15. «۩AhMeD 3LaM۩» Says:

    >انا ممكن اعمل فيدوهات اقولك علي حاجه انت تحط بردو قناة الجزيره لايف بحيث يبقي بجانب القرائه يبقي في فيدوهات وكمان قناة اخباريه لايف

  16. ستيته حسب الله الحمش Says:

    >انا بعت ميل وربنا يقدرني وها أحط اللينك كماندماااغ مش قلت لك من شوية ربنا يحفظك

  17. زى الهوا Says:

    >انا عايزة اشترك بس مش عارفة هاجيب المواقع اللى هحط فيها الاخبار اذاى ؟؟ يعنى اكتب ايه فى السيرش مثلا اعذرنى لأنى مش بافتح غير البى بى سى العربية بس

  18. tarek alghnam Says:

    >اخى بارك الله فيك وفى مجهودكبيسعدنى اشوف شبابنا زيكوتعليمهم بيسخروة لخدمه دينهم ووطنهمتحياتى ليك ويسعدنى اكون معاكمواتمنى التواصل

  19. Lasto-adri *Blue* Says:

    >Hay mohamed, please count me in and send me an invitation..I dont know what I can write about.. but will try isA to make round ups ..lets see what we can do..thanks in advance, and sorry for the late reponse

  20. حسن مدني Says:

    >والله فكرة ممتازة يا صاحبي تحياتي

  21. Rasha Elkheshin Says:

    >في نفس المعني كتبت اليوم د.رشا عبد الله من الجاوعة الامريكية في المصري اليوم عن الحرب الاعلامية علي الانترنت ووجوب رد بنفس القوة في الساحة المعلوماتية لتوفير اعلام حقيقي عما يجري في غزةبعنوان: الحرب الإفتراضية ضد غزة على الإنترنتhttp://www.almasry-alyoum.com/article2.aspx?ArticleID=194407&IssueID=1283

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: