>عن "حكاب" إسراء وأشياء أخرى

>
إمبارح كنت مستنى دورى الطويل عند الحلاق , بحاول أسلى وقتى بقراية تقارير الجرايد عن حريق مصانع المحلة , ومتابعة فيلم “مرجان أحمد مرجان” على ART سينما فى التليفزيون لما دخلت علينا بنت صغيره عمرها حوالى عشر سنين . لابسه حجاب يناسب راسها الصغيرة .. قعدت جنبى … وفهمت من كلامها مع الحلاق إنها بنته …

ولإنه صاحبى .. ولإنى زهقان قررت إنى أكسر قواعدى الخاصة بعدم اللعب مع العيال الصغيرة لإن معظمهم رخمين وأشقياء وأول ما بياخدو عليك بيطلعوا عينك , و قررت ألاطف البنت شويه على سبيل مجاملة صاحبى …

البنت رغم سنها الصغير إلا إن حاجه فى عينها حسستنى إنها مضايقه أو زعلانه . يمكن الى يعرفنى شخصيا يعرف إنى من هواة رصد أبسط وأصغر التفاصيل فى شخصية أى حد بعرفه .. عشان كده سألتها بعد سؤالها عن إسمها : إيه يا إسراء الى مضايقك ؟

بعد إجابات كتيره على غرار (وإنت مالك) و (مش هقولك) و (ملكش دعوة) قالتلى إسراء : أصل أنا مضايقه عشان بابا مصمم إنى ألبس (الحكاب) !

وبعد شوية تفكير وترجمة لكلمة (حكاب) على إنه (حجاب) سألتها : طيب إنتى مش عاوزة تلبسى (الحكاب) ليه ؟

عشان الدنيا حر … وعشان أنا شعرى جميل .. أحلى من شعر البت إيمان .. بس أنا بابا صمم إنى ألبسه برضو وإيمان بتغيظنى و … و …. و …. (إتخنق صوتها بالعياط) … بصت لأبوها وراحت معيطه …

طبعا انا موقفى كان مُحرج جدا بعد ما إتسببت فى فتح المشكله من جديد فى محل صديقى الحلاق وقدام كل زباينه .. لكنه حسم المناقشه بينه وبين إسراء بإستعمال الترغيب شويه والتهديد شويه … وإستعمل جمل مؤثره من عينة (مش هنجيب الشيكولاته) و (مش هنروح البحر) ناهيك عن البصات القويه الى بتتوعدها بعلقه سخنة لما ترجع البيت …

عدى الوقت ببطء من جديد وجه دورى عشان أحلق شعرى .. بعد شويه من إستقرارى على الكرسى وبداية الحلاقه سألت صاحبى : هو إنت ليه غاصب البنت على الحكـ… قصدى الحجاب ؟

ياعم مانت عارف محدش بقا يأمن شر الناس فى الزمن المنيل ده .. كل يوم نقرا فى الجرايد عن راجل عجوز اغتصب (لامؤاخذة) بنت صغيرة … والسن والدين مبقوش يعصموا الناس النهرده من قلة الأدب .. أنا قلت أحمى البنت من كل ده .

سألته بإستغراب حقيقى : وإيه علاقة الحجاب برغبتك فى حماية البنت ؟
جاوبنى : علاقه جامده طبعا .. البنت عمر ما حد هيقربلها لو لابسه الحجاب الى قال عليه شرع ربنا !
سألته بغيظ : يعنى إنت عاوز تفهمنى إن الراجل الكبير الى لقى فى نفسة القدره النفسيه والعقلية إنه يتحرش ببنت صغيرة هتفرق معاه البنت دى محجبه أو لاء ؟!

* * *

القصة الى فاتت مثال صغير على الطريقة الى اصبح الناس تفكر بيها فى مصر . منطق غريب جدا أصبح مسيطر على عقول شريحة كبيره من الناس فى المجتمع , وهو منطق إن كل المصايب والمشاكل الى بتحصل لنا نتيجتها مش إنحراف الناس وإختلال التركيبه الاقتصادية والمجتمعية . لكن نتيجتها هى إن الناس الى وقع عليهم المصيبه هما الى مخدوش بالهم وعملو حسابهم !

مثلا البنات ضحايا حوادث التحرش والإغتصاب , لسه كتير جدا من الشباب شايفين إن البنات دى هيا الى جابت لنفسها التحرش والإهانه ! نتيجة لبسهم القصير والعريان وكلامهم المغرى ! وموقف صديقى الحلاق هو موقف شخص واحد من عدد كبير جدا من الناس شايفين إن إنتشار الحجاب بيحد من ظاهرة التحرش والإغتصاب , وإن البنت هى الى بتشجع المغتصب عشان يعمل جريمته .

لحد فترة قريبة كنت بتناقش بصعوبه مع ناس من أصحاب المنطق السابق , ومكانش معايا مواقف فعلية أقدر أبرهن بيها على إن الحجاب أو حتى النقاب مش بيمنع المغتصب أو المتحرش من عمل جريمته .. لكن الى كنت متوقعه حصل , وإنتشر خبر على مواقع الإنترنت وخصوصا موقع العربية نت , عن حدوث تحرشات جماعية بالبنات فى العيد الصغير

كنت بقرأ التحقيق على موقع العربية بنصف ذهن .. لانى كنت متوقع تكرار نفس احداث السنه الى فاتت والى قبلها والى قبلها .. الى اثارنى المره دى فى التحقيق بعض الجمل الى وردت فيه .. منها :
تمكن الأمن من القبض علي ٣٨ شاباً فيما هرب الباقون، وذكرت فتيات من ضحايا التحرش -إحداهن منتقبة – إن الشباب هاجموهن بالأيدي ومزقوا ملابس البعض ونزعوا حجاب واحدة، وأن تجمعات من الشباب كانت تحاصر فتيات في مواقع متفرقة من الشارع.
أخيرا برهن الواقع على صدق نظريتى … الحجاب أو حتى النقاب مش بيمنع (ومش هيمنع) حالات التحرش والإغتصاب . لإن بإختصار الشخص المتحرش معندوش العقلية الإنتقائيه إنه يختار المحجبه أو غيرها … هو فقط بيوجه كبته الجنسى ناحية أى شىء يحمل صفة الأنوثه بيشوفه فى طريقه .

* * *

تعالو نتناول القضية من منظور أخر بعيدا عن نظرية الإغتصاب والتحرش … منظور كيفية مكافحة الظاهره دى … أنا شخصيا شايف إن الحل مش إن البنات تلبس حجاب أو نقاب , لإن تغظية الجسد مش هيمنع المتحرش من القيام بغلطته , وكمان فكر الحجاب من أجل الحماية فكرة جبانة ضعيفه إنهزامية , لإن الأساس لمعالجة المشاكل هو المواجهة وليس الإنسحاب , والجيوش المنتصرة فى الحروب هى الجيوش المهاجمة ليس المدافعة .
أيضا لازم نعرف إن إتباع الفكر الإنهزامى مش هيؤدى غير لمزيد من الهزائم , يعنى لو النهرده حد بيدعو للحجاب عشان ميحصلش تحرش .. مع الوقت هيتحول ده لوضع عادى وهتبدأ التحرشات من جديد وهيظهر الى يقولنا لازم تلبسو النقاب عشان ميحصلش تحرش .. ثم يتحول النقاب لشىء عادى ويعود التحرش فيظهر علينا الى يقولنا لازم البنات متنزلش من البيت عشان ميحصلش تحرش …. وهكذا .. وكل ده عشان المشكله متحلتش من جذورها وإكتفينا بالتراجع الجبان قدامها .

الحل إذن يكون من خلال حاجه أساسية ومهمة , وهى إننا نعلم الشباب يحل مشاكله بنفسه .. لإن من فتره انتشرت فى المجتمع سياسة إلقاء نتائج الأخطاء على الأخرين .. يعنى مثلا شاب مكبوت جنسيا ومش لاقى يتجوز عشان معهوش فلوس بدل ما يدور على شغل أو حتى يعمل مظاهره قدام وزارة القوى العالمه .. يروح يعاكس ويتحرش ببنات الناس ويقول اعمل إيه ما أنا ظروفى صعبه !

أيضا لازم نعرف الشباب إن سلوك الأخرين مش زريعه لسوء سلوكك , وده رد حاسم على أصحاب نظرية (روح شوف البنات لابسه ايه وانت تعرف أننا من حقنا نتحرش ونعاكس) لإن أى منطق عقلى او حتى دينى بيرفض إننا نتحول لمجرد ردود أفعال لسلوك الأخرين وإلا كانت مصايب كتير حصلت بدعوى إن الأخرين بيشجعونا على السلوك ده !

أظن كل الكلام الى فات ده يفسر أنا ليه طبعت تقرير العربية نت ووديته لصاحبى الحلاق يمكن يعيد التفكير فى (حكاب) إسراء بنته …

تفتكرو هيحصل ؟!

23 Responses to “>عن "حكاب" إسراء وأشياء أخرى”

  1. قلب مصرى Says:

    >ربنا سبحانه وتعالى لما أمرنا بغض البصر ما كنش الأمر مشروط بإن اللى لابسة عريان من حقك تبص عليها، بالعكس الأمر كان عام على الجميع يعنى إحنا نحترم نفسنا ومالناش دعوة بغيرنا.بس تيلم دماغك

  2. Desert cat Says:

    >اسراء ومثيلاتها ضحية لفكر عقيم جبان يخشى المواجهه والوقوف على المشكلة لحلها يستهين بالظبم ويخنع له حتى اصبحت الفوضى والعشوائية ثمة مميزة وان تحاورت معهم يلصقها بالدين حتى لا تتهمه بالجبن والخنوع فان حدث لاحداهن مكروه وهى ملثمة يخشى اهلها الفضيحة وعدم ابلاغ الشرطة او اتخاذ اى موقف مدافع فهنيئا للذئاب البشرية المنتشرة على حافة الطرقات بالمتحرش بها سواء كانت محجبه او ملثمة لطالما الخوف هو سيد الموقفتحياتى

  3. PrinceJimi Says:

    >لا استطيع ان اقول الا… كلامك صحيح…

  4. Warrior King Says:

    >بغض النظر عن قصة اسراء الي متفق معاك انها حتبقي ضحية لأبوها بس انا مختلف معاك الحجاب أو خلينا نسميه (الاحتشام في اللبس عشان ميبقاش الموضع كلام عن غطاء للرأس و خلاص ) مش حماية من المتحرشين للبساه لأ ديه حماية للمجتمع كله عشان لما الشباب يمشي في الشارع في العيد ميشوفش مناظر تستفزه يقوم يتحرش بأي أنثي زي ما انت بتقول مش عاوز برده الكام يقودنا لنقاش عن جدوي الاحتشام و هل هو الحل و لا لأ بس أنا بوضح و جهة نظر تانية بس عشان احنا مشكلتنا اننا بنحب نتطرف في آرائنا و نختزلها في (مع) او (ضد) وخلاص بنحب نريح دماغنا و نخلي كل حاجة في الدنيا مطلقة رغم ان كل حاجة نسبيةأخيرا أحب بالمناسبة اعرف رأيك (ان كان للنشر🙂 ) انت شايف ان (احتشام) المرأة حق للجتمع عليها و لا حرية شخصية ؟تحياتي ليك و بالتوفيق دوما

  5. عاقلة علي ارض الجنون Says:

    >أنا معاك تماما فيما تقولو فيه نقطه تانيه لو قلنا حتي ان الوازع الديني الشكلي و هو الحجاب هيمنع البنت من فعل أي فواحش ده لو قلنا انها فعلا بتفعل ما يجذب إليها الانتباه بشكل جنسي .. انا ياما شفت بنات محجبات و معهم شباب أيديعم علي خصورهن و أكتافهن .. يعني حتي الراجل ده المفروض يزرع أخلاق الحجاب و بعدها هيلاقي البنت هي اللي عاوزه تتحجب لانه شرع ربنا و هيساعدها انها تحمي نفسها لكن ده مش هو كل الحمايهأما عن التحرشات و الأشياء دي انا بأيدك في رأيك فيها و بصراحه معنديش إضافه علي تعليقكو بحييك علي دماغكتحياتي ياسمين

  6. عاقلة علي ارض الجنون Says:

    >اه صحيح نسيت أقولك اني اتبسطت أوي لما قريت تعليقك عندي .. كنت مزقططه أوي😀

  7. ojg Says:

    >زي ما قلتالمشكلة اننا بنسيب الأصل ونمسك في الفروعيعني هو حكاب إسراءهيمنع مين انه يتحرش بيها؟؟بالعكس بقىولك أن تتعجبمرة بالصدفة قريت بوست وللأسف مش فاكره فينبيتكلم عن نصايح للشاب اللي عايز يتحرش بواحده في المواصلات العامةوان احسن حد ممكن يتحرش بيه هيالبنت المحجبة أو المنتقبة عشان هتحرج وهتكون أقرب للصمت من البنت الأخرى غير المحجبةطبعا الكلام منتهى العتهبس اللي نخرج بيه منه ان الشباب اللي بيفكروا في كده ودي نظرتهممش هيردعهم وجود حجاب او احتشام البنت في لبسها بالعكسلا أنكر ان كلما كانت ملابس الفتاة كاشفة، كلما زادت المضايقات اللفظية وأحيانا الفعلية، إلا أن عكس الأمر لا يمنعهاالبوست رائعشكرا للطرح

  8. kochia Says:

    >سنها صغير علي الحجاب ومش مفروض نربطه بموضوع التحرش والمفروض نربطه بموضوع الدين وفعلا المتحرشون مش بيبصوا للمحجبة او غيره لانهم مرضي ولكن لن ننكر ان تعرض الغير متحجبات للتحرش اكثر لكن الكبت اللي بنسببه للاطفال قبل سن الحجاب بكتير ممكن يؤثر سلبا علي شخصيتهم تحياتي

  9. هبة النيــل Says:

    >أستاذ محمدمساء الفلصح مش من حق الشاب إنه يقول إن البنت هي اللي دفعته لكدالكن مش منطقي أبدا بردو “إنها تستفزه”أستاذ محمدلي قريب نشأ بالولايات المتحدة واستمرت معيشته هناكوعندما حضر مصر أخذناه ل”نادي الشمس”فوجئنا بيه بيقول “كل دول فتيات ليل” بدون مبالغة منيهو تخيل أنهم كدا من لبسهم المستفزأمهاتنا زمان مكنوش محجبات لكن دون استفزاز يا فندمحتى بالأفلام الأجنبية فإن لبسهم العادي نعم ليس حجابولكن عندما تأتي احداهن ترتدي لبس بناتنا اليوم يا فندم تظهر على أنها مش مزبوطةالحج أبو اسراءيحاول الحفاظ على ابنته “وهي التي يملك زمام أمورها”لأنه لا يملك زمام أمور باقي الناسولا يملك أن يحكم “بالاعدام” على من يتجرأ ويشوه حياة طفلة مثل ذلك ويتركها بعاها نفسية مستديمة أرق المنى

  10. banouta masreya Says:

    >بعيدا عن فرض الحجاب و الاحتشام من عدمهم اللى حاصل فى مصر ده حالة هوس جنسي لا ليها دعوة بحشمة ولا بقلة حجاب..الشباب بيعاكس لمجرد المعاكسة..محجبة..منقبة..سافرة مش بتفرق كتير و ان كانوا اللى مش محجبات بيتبصلهم دايما على انهم ساقطات و ان عدم حجابهم مبرر اضافى للتحرش بيهمبس انا عايزة افهم حاجة المحجبة اللى مبينة القصة و لابسة ستريتش دى كده حجابها بيصونها و بيحميها؟ما ينفعش ابدا نختزل الاخلاق و الكرامة و العفة فى حتة قماش و بس..ربنا اعلم باللى فى القلوب و هو اللى هيحاسب نقوم احنا نقرر ننصب نفسنا حكام على البشر و دى تستاهل تتعاكس و تتهان و دى لأ..على اساس ايه يعنى؟انا مش محجبة..و ممكن جدا اصحى بكرة اقرر اتحجب لكن عمرى ما هاخد القرار ده عشان ارضى مجتمع مريض بالفصام و التخلف العقلىو اللى فرض الحجاب فرض غض البصر ليه كل واحد بياخد الجزء اللى يريح ضميره ده اذا كان عنده اى ضمير اساساو اللى زى اسراء اللى بيتعملهم ارهاب و غسيل مخ عمرهم ما هيقتنعوا باللى هم لابسينه و مع اول فرصة هيتجهوا للعكس تماما عمرهم ما هيعرفوا حلاوة الطاعة دى لانهم ما اختاروهاش من الاساسو هيفضل الحجاب مرتبط عندهم ب”زغرة” الاب و ضرب من الاماسفة على الرغى ده كله بس الموضوع ده هاممنى جدا جدا

  11. dr.lecter Says:

    >شاب + بطاله+ تاخر زواج+ احباط+ ازمه اقتصاديه+ غياب وعي ديني معتدل مش من نوعيه قال الله وقال الرسول + احتقار المجتمع للوسط اللي بينتمي له الشاب ولمؤهله الدراسي ولشكله +اعلام سافر+ احساس بانه ليس له وجود ولا كيان ولا فايده في المجتمع=تحرش جنسي + تطرف+ اتفجار + انتحاروماحدش ييجي يقول لي الشباب بيعملوا كده ليه المشكله مش في البنات ولا الحجاب ولا الحكومهالمشكله فينا احنا كمجتمع عربي مصرياحنا اللي بنزرع القذاره دي كلها جوانا ونجني ثمارها في الاخر وشكرا

  12. اجندا حمرا Says:

    >للأسف يامحمد الحجاب مش هو ده الوسيله الفعاله لحمايه البنت عشان زي ماقلت اللي عنده الرغبه انه يعمل اي حاجه مش حيفكر ان البنت لابسه حجاب و لا مش لابسه و الأمثله كتيره و بنسمع عنها كل يوملكن تقول لمين و مين حيسمع الكلام اللي بنقوله الناس اللي في مخها في مخها ماعندهاش استعداد للتفاهم و النقاش الموضوعي

  13. blackcairorose Says:

    >طيب السؤال التقليدى والذى لا يجرؤ أحد على الرد عليه بصراحة هو لماذا فى الستينات كانت الحرية فى ارتداء الملابس أكبر بكثير من الآن والتحرش كان اقل كثيرا من الان؟لم تكن هناك حرية جنسية نبرر بها عدم وجود كبت فى الستينات، ولم نكن متأثرين بالغرب بشكل أكبر من الآن فى رأيى، ومع ذلك كل قيمنا ـ استطيع أن اقول كلها بدون احساس أننى ابالغ ـ كانت افضل واكثر احتراما للحرية وللانسانية وللحدود الشخصيةتزايد الهوس الدينى ـ ولا اقول التدين ـ صاحبته بكل ثبات زيادة فى التحرش الجنسى

  14. bos bos Says:

    >يعنى هو الحجاب اللى هيبعد عنها أى حد عايز يتحرش بيها أو يعاكسها مين قال كدهانا طبعا مش ضد الحجاب بس مش من دلوقتى دى لسة طفلة ولكن كتير قوى بنات محجبات وملتزمات جدا فى لبسهم وبيتعرضوا للتحرش يعنى الحجاب مش هيمنع ده

  15. احمد نور الدين Says:

    >طبعا مش هنتكلم عن موضوع اسراء .. وموقفها اما تكبر من الحجاب اللي لابسته عن كره لا عن اقتناع وحبانا متفق مع حضرتك في نظريتك” الأساس لمعالجة المشاكل هو المواجهة وليس الإنسحاب , والجيوش المنتصرة فى الحروب هى الجيوش المهاجمة ليس المدافعة .أيضا لازم نعرف إن إتباع الفكر الإنهزامى مش هيؤدى غير لمزيد من الهزائم “دا اذا كنت بتنظر للموضوع النظرة ديوكقاعدة عامة فهي بالتأكيد صحيحة تمامالكن ليه اعتبار الحجاب فكرة انهزامية ؟؟؟الحجاب فرض من ربنا زي غض البصر يعني مش الشجاعة ان احنا نقلع البنات الحجاب ونقولهم واجهوا المشاكلوالنظرية مش انهم بيتحجبوا عشان الهروب من التحرشلو اخدوا الحجاب مجرد اداة للهروب من التحرش مش لارضاء ربنا سبحانه وتعالى يبقى بناقصهلكن مفروض على البنت الاول قبل ما تتكلم عن التحرش والشباب انها تكون ملتزمة باوامر ربناساعتها لما حد ييجي يتحرش مايقدرش يكلمهاونقدر نقول بالفم المليان انها عملت اللي عليها وان الغلط غلط المتحرش وحدهساعتها هنخرس كل الافواه المجعرة بأن من حقنا نتحرش مادام ” البنات لابسة كده “

  16. نيجار Says:

    >اولا بأشكرك على تشريفك لمدونتي المتواضعه وبجد مدونتك رائعه ومواضيعك تحفه وبالنسبه لموضوع الحجاب فهو بكل تأكد الحجاب مش هيمنع التحرشات اللي بتحصل بدليل ان موضوع التحرش موجود عندنا في الصعيد من قيل ما يكتر في القاهره بالصوره دي وعلى فكره اكترنا محجبات وما بنحطش ميكب الا في المناسبات وبالعكس التحرش عندنا بقى حاجه لا تطاق اكيد ده بيبقى خلل في الشخص نفسه وكل سنه وانت طيب تحياتي

  17. mahasen saber Says:

    >شوف يا حمدى هو الحجاب زى انما مش درع يقدر يحمى المرأه فى الشارعوالدليل زى ما قلت ان كان من ضمن البنات اليى تعرضوا لتحرش واحده منقبه وفعلا اليى بيفكر يغتصب واحده مش بيقعد يختار ولا بيفكر ولا عنده ضمير اصلا ولا انسانيه عشان يركز فىجريمته زبعدين المحجبه والغير محجبه ادميات بشر زى بعض ميفرقش بينهم الا ربنا وحده…

  18. محمد العربى Says:

    >والله يا صديقى انا شايف ان احنا ناخد بالامرين معا … البنات تحتشم فى لبسها .. والشباب يتقى ربنا ويعرف ان للطريق حقه .. بكده بس نقدر ان احنا نمع الظاهره ديه, فيه حل اعتقد انه على الحكومه فعله وهو حل اعتقد انه هيختلف معايا كتير فيه * الحل هو ان احنا نقوم بخصى هولاء الاوغاد حتى يكونو عبره لغيرهم *وانا اسف انى استخدمت الكلمه ديه … لكن الموضوع بجد اظن انه خرج عن كل سيطره ولازم ان احنا نضرب بيد من حديد على هولاء الاوغاد

  19. نسر الشرق Says:

    >شوف يا اخ دماغاول حاجه عايزين نتفق عليها ان الحجاب ده فرض من ربنا سبحانه وتعالى علشان كده لازم نلتزم بيه من غير فلسفهثانياان الناس اللى انت بتقول عليهم بيتحرشوا باى واحده والسلام دول ناس سيكوباتيينبمعنى بيعملوا كل حاجه غلط لاى سببيعنى يقتل من غير سببيسرق وهو مش محتاجودول احنا ابتلينا بيهم ومنقدرش على غير محاربتهماما فى ناس تانيه ودول معظم الناس الظروف هى اللى بتدفعهم للجريمهواحد امه تعبانه ومحتاجه عمليه ولو ماسرقش امه هتموت فيسرقواحد ظلم واحد وخد حقه فالتانى اتغاظ وقتلهواحد مش قادر يتجوز وشايف البنات لابسه ايه ووقع فى الغلطبس لو لقى الصح كان عملهيبقى دول اللى لازم نساعدهم نوفر العلاج المجانى للامونوفر العداله للمظلوم ونلبس الحجاب ونيسر الزواج على اللى مش قادراما انك تجعل منهم كلهم سيكوباتيين يبقى ده ايهاهلا بيك على مدونتىhttp://nisr-elsharq.blogspot.com/

  20. prince4ever Says:

    >عند حق يا برنس واللهلا عاد بيفرق لا حجاب و لا مش حجاب…والمقصود بالحجاب هو الحجاب اللي بجد يعني حجاب الجسم باكمله مش شوية شعر متغطيين والباقي زي ما انت عارفمش هقولك حاسب الدوله اللي خلت الشباب يوصل لكده لانه مش لاقي يجوز…لأ… تردي الاخلاق هو اللي وصلنا لكده… لانه الشباب نفسه اللي اخلاقه تردت و تدهورت..لانه مش معنى انه مش قادر يتجوز يروح متحرش او مغتصب…مش لاي ياكل يروح يسرق…غياب الوازع الديني و انهيار المثل هو اللي خلاه كده…مدونه غاااااااايه في الروعه وانت مدون مبدع و عقل محترمتحياتيرامي..قصاصة ورق

  21. ~*§¦§ Appy §¦§*~ Says:

    >النبى تسلم دماغك اولا الراجل ثقافه جهل يعنى بدل ما يوعى بته ويقولها متروحش مع حد ولا ترد على حد يعمل كده تعرف ان ده السبب فى ان البنات بيلبسواالحجاب ومبيعملوش بتعاليم صح علشان كده بنلاقى محجبات مش كويسين وبياخدوا فى رجليهم الكويسن اما عن التحرش تسلم دماغك يقولوا البنات هما السبب طيب والله هنفضل زى ما احنا ويبقوا يورنا هيعملوا ايه واللى يجى ناحيتى يا قاتل يا مقتول ده انعدام اخلاق ودين وكل حاجه

  22. اقصوصه Says:

    >صح البنت صغيرهبس اعتقد لو الاب تعامل مع موضوع الحجاب بشكل ثاني كان احسنيعني لو استعمل الترغيب بس وباتعد عن الترهيبوبنفس الوقت خلاها تتخذ هالقرار بنفسها بد ما اقنعها باهمية الحجابكان احسن لها

  23. koukawy Says:

    >هو كده لو البنت عايزه تتحجب لما تكبر هو ابوها بيكرهها فيه و يخليها لما تمسك زماما امورها تفلتانا ما بقولش انه ما يحافظ عليها انما الحفاظ عليها اصعب كتير من مجرد انه يغطيها من فوق لتحت و هي اصلا ما عندهاش اي شئ مثير

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: